İtkin düşən 6 yaşlı uşaq görün necə tapıldı - VİDEO

Türkiyənin Antalya şəhərinin Serik rayonunda evlərinin yaxınlığında oynayarkən itkin düşən 6 yaşlı Bünyamin Çitçi 9 saat davam edən axtarışlardan sonra evlərinin yanındakı anbarda, taxta altlıqların üzərinə sərilmiş örtüklərin arasında yatmış vəziyyətdə tapılıb.

Sonxeber.az xarici mediaya istinadla xəbər verir ki, Gedik məhəlləsinin Karakoyunlar ərazisində yaşayan Bünyamin dünən saat 18:00 radələrində evlərinin yaxınlığında oynayarkən yoxa çıxıb. Uşağı tapa bilməyən ailəsi muxtardan kömək istəyib. 112 Təcili Çağrı Mərkəzinə edilən müraciətdən sonra ərazidə axtarışlara başlanılıb.

Axtarışlara AFAD, polis və səhiyyə əməkdaşları ilə yanaşı, yerli sakinlər də qoşulub. Təxminən 9 saat davam edən axtarışlardan sonra Bünyamin saat 03:00 radələrində evin yanında toyuq damı və anbar kimi istifadə olunan yerdə, taxta altlıqların üzərinə sərilmiş örtüklərin arasında yatarkən tapılıb.

Tibbi müayinədən keçirilən uşağın vəziyyətinin yaxşı olduğu bildirilib.

Bünyaminin tapıldığı anlar mobil telefonla lentə alınıb. Axtarış qruplarının bir neçə dəfə adını səsləndirməsindən sonra yuxudan oyanan uşaq qarşısında xilasediciləri və onu axtaran sakinləri görəndə təəccüblənib. Bir müddət nə baş verdiyini anlamayan Bünyamin daha sonra özünə gəlib.

Uşağın sağ-salamat tapılması axtarışda iştirak edən əməkdaşlar və sakinlər arasında böyük sevincə səbəb olub. Həmin anlar çəkilən görüntülərdə də əksini tapıb.

Telegramda izləyin