Kababçı Nusretin hesabından pul oğurlayan şəxs bu dəfə Hadisəni hədəf aldı

Daha əvvəl "Nusr-Et" restoranlar şəbəkəsinin sahibi Nusret Gökçənin hesabından saxta vəkalətnamə ilə 200 min lirə çıxaran İbrahim Aykut Büyümüştenin bu dəfə məşhur müğənni Hadisənin mal varlığını ələ keçirməyə cəhd etdiyi üzə çıxıb.

Sonxeber.az türk mediasına istinadən xəbər verir ki, Büyümüşten saxta elektron imza istifadə edərək hazırladığı saxta məhkəmə qərarı ilə özünü Hadisə Açıkgözün qəyyumu (vasisi) kimi göstərməyə çalışıb. O, əvvəlcə həyat yoldaşı həbsdə olduğu üçün ona qəyyum təyin edildiyi haqda Qaziantep 5-ci Sulh Hüquq Məhkəməsinin qərarını ələ keçirib, sənəddəki məhkumun adını dəyişdirərək Hadisənin adını yazıb. Daha sonra bu saxta sənədi elektron imza ilə təsdiqləyərək qanuni sənəd kimi təqdim edib.

Büyümüştenin məqsədi Hadisənin bank hesabları və daşınmaz əmlak üzərində sərəncam vermək səlahiyyətini ələ keçirmək idi. Lakin bank əməkdaşları sənədi araşdırarkən şübhəli məqamları görərək dərhal polisə müraciət ediblər.

Qaziantep 5-ci Sulh Hüquq Məhkəməsi, sənədi saxta şəkildə dəyişdirərək rəsmi qurumlara təqdim edən Büyümüşten haqqında prokurorluğa şikayət edib. Hadisə isə adının heç bir əlaqəsi olmadığı işdə istifadə edildiyini öyrəndikdən sonra şübhəli barəsində rəsmi şikayət verib.

Hadisənin vəkili Orxan Erol Müəzzinoğlu, "Hadisə xanım bir şəbəkənin qurbanı olub" deyərək hüquqi prosesin diqqətlə izlənildiyini bildirib.

Telegramda izləyin