Niyə flaminqolar çəhrayıdır və onlar doğulduqda necə görünürlər?

Flaminqoların tüklərinin çəhrayı rəngi onların qidalanma tərzi və bəzi digər amillərlə bağlıdır. Maraqlıdır ki, bu quşlar çəhrayı rəngdə doğulmur.

Qaynarinfo "BBC Wildlife Magazine" portalına istinadən ki, flaminqoların parlaq rəngi qida mənbələrindəki karotinoid piqmentlərdən yaranır. Bu piqmentlər yosunlarda və qabıqlı su canlılarında olur. Koloniyada ən parlaq çəhrayı rəngə sahib olan quşlar daha yüksək statusa malikdir, çünki bu, onların sağlam, güclü və qida mənbələrini tapmaqda uğurlu olduqlarını göstərir.

Çoxalma dövründə yüksək mövqedə olan flaminqolar tüklərinin rəngini daha da gücləndirərək sürüdəki digər fərdlərə təsir edir və bu, cütləşmə mərasimlərinin başlanğıcını verir. Maraqlıdır ki, flaminqoların daxili orqanları da çəhrayı rəngdədir. Onlar yosun, xırda qabıqlı canlılar və mikroskopik bitki mənşəli materiallardan gələn karotinoidləri toplayıb mənimsəmək üçün uyğunlaşıblar. Bu piqmentlər narıncı, qırmızı, sarı və çəhrayı çalarlar yaradır.

Flaminqolar doğulduqda solğun rəngdə olur və valideynlərinin onları bəslədiyi qırmızımtıl "quş südü" sayəsində tədricən çəhrayı rəng alırlar. Yetişkin quşlarda isə çoxalma mövsümündə tük rəngi solur. Bunun səbəbi lələk dəyişməsi və həmin dövrdə zəif qidalanmadır, nəticədə yeni tüklər əvvəlki qədər parlaq olmur.

Flaminqolar ovlarını necə tutur?

Kaliforniya Berkli Universitetinin alimləri, Corciya Texnologiya İnstitutu və Kennesaw Dövlət Universitetinin mütəxəssisləri ilə birgə apardıqları araşdırmada çilili flaminqoların qeyri-adi ov üsulunu aşkar ediblər.

Onlar ovlarını tutmaq üçün ayaqların hərəkəti, başın mövqeyi və dimdiyin sürətli çırpılması kombinasiyasından istifadə edirlər. Ayaqları ilə suyun dibindəki çöküntünü qarışdırır, yerində "rəqs edərək" ayaqlarını palçağa batırıb qaldırırlar. Bu zaman su və çöküntü burulğan şəklində yuxarı qalxır, flaminqo isə başını suya salaraq dairəvi axın içində ovunu tutur. Bu quşların özünəməxsus G formalı dimdiyi onlara qidanı səmərəli şəkildə süzməyə imkan verir.

Telegramda izləyin