Evin zirzəmisində tüp partladı: 2 nəfər yaralandı

Konyada 2 mərtəbəli evin zirzəmisində yerləşən emalatxanada tüp partlaması nəticəsində 2 nəfər xəsarət alıb.

Sonxeber.az türk mediasına istinadən xəbər verir ki, hadisə saat 22:30 radələrində mərkəz Meram rayonunun Hatıp məhəlləsi, Refik küçəsində yerləşən 2 mərtəbəli evdə baş verib. Məlumata görə, evin zirzəmisindəki emalatxanada Murat Ö. və adı hələ öyrənilməyən dostu oturarkən qəfil tüp partlayıb.

Partlayış səsindən sonra ətraf sakinlərin verdiyi məlumat əsasında hadisə yerinə təcili yardım, yanğınsöndürən və polis əməkdaşları cəlb olunub. Yanğınsöndürənlər emalatxanada yaranan kiçik yanğını qısa müddətdə söndürüblər.

Tibbi yardım briqadası isə Murat Ö. və dostuna ilkin müdaxilə edib. Yaralılar daha sonra təcili yardım maşını ilə Konya Şəhər Xəstəxanasına aparılıb. Onların həyatının təhlükədə olmadığı bildirilib.

Polis əməkdaşları hadisə yerində genişmiqyaslı araşdırma aparıb. Partlayışın səbəbi isə aparılacaq ekspertiza sonrası dəqiqləşəcək. Hadisə ilə bağlı istintaq davam etdirilir.

Telegramda izləyin