"Andromeda" yelkənli gəmisi və dörd dalğıc: "Şimal axını"nın partladılması ilə bağlı TƏFƏRRÜAT

"Şimal axını"nın hər iki qaz kəməri ən azı dörd partlayıcı qurğu ilə sıradan çıxarılıb.

Oxu.Az-ın məlumatına görə, bu barədə SVT əldə etdiyi sənədlərə əsasən xəbər yayıb.

Alman istintaqçılarının versiyasına görə, bu qurğular taymerlərlə təchiz edilərək "Andromeda" adlı yelkənli gəmi vasitəsilə Baltik dənizinə çatdırılıb.

Xatırladaq ki, bu yaxınlarda İtaliya kurortunda partlayışlarda şübhəli bilinən 49 yaşlı kişi saxlanılıb. Alman tərəfinin məlumatına görə, o, Ukrayna vətəndaşıdır, Ukrayna və rus dillərini bilir.

Sənədlərə əsasən, "Andromeda" gəmisinin göyərtəsində altı nəfərdən ibarət komanda olub ki, onlardan dördü dalğıc imiş. Gecə vaxtı onlar 70-80 metr dərinlikdə hər biri 14-27 kq ağırlığında olan azı dörd partlayıcı qurğu yerləşdiriblər. Partlayış üçün oktogen və heksogen kimi güclü partlayıcı maddələrdən istifadə edilib.

Bu yaxınlarda İtaliya kurortunda partlayışlarda şübhəli bilinərək saxlanılan şəxs isə əməliyyatda koordinasiya və planlaşdırma rolu oynayıb. Yelkənli gəmi 2022-ci ilin sentyabr ayının əvvəlində Almaniyanın Rügen adasından icarəyə götürülüb və yalnız bir neçə həftə sonra geri qaytarılıb. Şahidlər, həmçinin bildiriblər ki, gəmi yanacaq doldurmaq üçün İsveçin Sandhamn limanına da daxil olub.

İlkin olaraq partlayışları bir neçə ölkə, o cümlədən sualtı robotlardan istifadə edərək dəlil toplayan İsveç araşdırıb. Lakin 2024-cü ilin fevralında İsveç prokurorluğu öz istintaqını dayandıraraq materialları Almaniyaya təhvil verib.

Telegramda izləyin