Toy kortejində dəhşətli qəza - Gəlin xəstəxanaya aparıldı

Türkiyədə toy kortejində baş verən yol-nəqliyyat hadisəsi nəticəsində 2 nəfər xəsarət alıb. Gəlin isə toy zalına deyil, xəstəxanaya çatdırılıb.

Sonxeber.az türk mediasına istinadən xəbər verir ki, hadisə Samsun–Sinop magistral yolunda baş verib. Məlumata görə, Sinop istiqamətində hərəkətdə olan İbrahim Balkalın idarə etdiyi avtomobil, eyni istiqamətdə gedən Emre Mertin idarə etdiyi gəlin maşınını sağ tərəfdən keçməyə cəhd edib.

Lakin sürücünün idarəetməni itirməsi nəticəsində avtomobil gəlin maşınına çırpılıb. Zərbənin təsiri ilə gəlin maşını yolayırıcı baryerlərə dəyərək qarşı hərəkət zolağına keçib. Qəzaya səbəb olan avtomobil isə təxminən 50 metr irəlidə dayana bilib.

Nəticədə gəlin Selin Cingöz (25 yaş) və avtomobildə olan Nisanur Özçelik (24 yaş) xəsarət alıblar. Yaralılar təcili tibbi yardım briqadaları tərəfindən Bafra Dövlət Xəstəxanasına yerləşdirilib.

Hadisə ilə bağlı araşdırma aparılır.

Telegramda izləyin