Rüşvətxor hərbi polis həbs olundu

Rusiyanın Cənub dairə hərbi məhkəməsi keçmiş hərbi polis əməkdaşı Oleq Makoyev barəsində çıxarılan hökmü qanuni hesab edib. O, hərbi hissəsini özbaşına tərk etmiş hərbçilərdən rüşvət almaq və şəxsi məqsədlər üçün vəzifə səlahiyyətlərindən sui-istifadə etməkdə təqsirli bilinib. O, cəzasını ciddi rejimli həbsxanada çəkməklə 8 il müddətinə azadlıqdan məhrum edilib.

Lent.az yerli mediaya istinadla bildirir ki, məhkəmənin müəyyən etdiyinə görə, hərbi hissəsini tərk etmiş hərbçilərin toplanma məntəqəsinin rəisi vəzifəsini icra edən kapitan Makoyev rüşvət alaraq onlara müxtəlif "xidmətlər" göstərib. O, pulla digər bölmələrə köçürülməyə kömək edəcəyini, qarnizon hüdudlarından kənarda yaşamağa icazə verəcəyini, eləcə də zabit hazırlığı kurslarına namizədlərin siyahısına salacağını vəd edib.

Məhkəmə, rüşvətin əhəmiyyətli və böyük məbləğdə alınması, habelə xidməti vəziyyətdən istifadə etməklə dələduzluq daxil olmaqla cinayətlərin məcmusuna görə, ona beş il müddətinə dövlət vəzifəsi tutmaq qadağası qoyub və zabit rütbəsini əlindən alıb.

Məhkəmə prosesində məhkum özünü təqsirli bilib, lakin cəzanın yüngülləşdirilməsini və onu Ukraynada müharibə zonasına xidmətə göndərilməsini xahiş etsə də, bu tələb təmin olunmayıb.

Telegramda izləyin