"Mərkəzi parkdakı kanalizasiya quyusu ilə bağlı yoxlama aparılıb" - RƏSMİ AÇIQLAMA

Ötən gün Mərkəzi Parkda azyaşlı uşağın açıq kanalizasiya quyusuna düşməsi cəmiyyətdə ciddi narahatlıq yaradıb. Təəssüf ki, bu, paytaxt küçələrində ilk belə hadisə deyil və mediaya yansıyanlar yalnız buzdağının görünən hissəsidir. Bəs, belə təhlükəli halların təkrarlanmaması üçün hansı tədbirlər görülür?

Mövzu ilə bağlı Sonxeber.az-a İri Şəhərlərin Birləşmiş Su Təchizat Xidmətinin (İSST) mətbuat xidmətindən məlumat verilib.

Qurumdan bildirilib ki, hadisə ilə bağlı ilkin olaraq parkın nəzarətçisinə müraciət olunub:

"Nəzarətçi əraziyə baxış keçirib və qapağın yerində olduğunu müəyyən edib. Daha sonra müvafiq rayon sukanal idarəsinin əməkdaşları da həmin quyunu yoxlayıblar və qapağın quyunun üstündə olduğunu təsdiqləyiblər".

Mətbuat xidməti əlavə edib ki, bəzən plastik və metal qapaqlar naməlum şəxslər tərəfindən çıxarılaraq oğurlanır:

"Belə hallar aşkarlananda dərhal tədbir görülür. Quyular xidmətdən qapaqlarla təmin olunur, lakin sonradan onların naməlum şəxslər tərəfindən çıxarılması ilə bağlı faktlara da rast gəlinir".

Vüsalə İbrahimli

Telegramda izləyin