Pensiyalardan əlavə bu şəxslərə ÖDƏNİŞLƏR EDİLƏCƏK

Azərbaycanda dövlət pensiya sistemindən fərqli olaraq, vətəndaşların könüllü şəkildə topladığı vəsaitlərin qorunmasını təmin edən özəl pensiya fondlarının yaradılması istiqamətində işlərə başlanılıb.

Bu fondların əsas məqsədi vətəndaşların pensiya yaşına çatdıqdan sonra yalnız dövlət təminatı ilə kifayətlənməməsi, əlavə olaraq özəl fondlardan da ödənişlər alaraq maddi vəziyyətlərini yaxşılaşdırmasıdır.

KONKRET.az itv-yə istinadən xəbər verir ki, Milli Məclisin Əmək və sosial siyasət komitəsinin sədri Musa Quliyevin sözlərinə görə, hazırda bu istiqamətdə qanunvericilik bazasının hazırlanması prosesi gedir. Layihə Əmək və Əhalinin Sosial Müdafiəsi Nazirliyi tərəfindən hazırlanır və hökumət daxilində razılaşdırma mərhələsindədir. Gözlənilir ki, sənəd ya payız, ya da yaz sessiyasında Milli Məclisə təqdim olunsun.

Əmək və Əhalinin Sosial Müdafiəsi Nazirliyinin şöbə müdirinin müavini Emil Əliyev bildirib ki, Avropa İttifaqının maliyyələşdirdiyi çərçivə-saziş layihəsi çərçivəsində beynəlxalq ekspertlər də prosesə cəlb ediliblər. Nazirlik nümayəndələrinin iştirakı ilə yaradılmış işçi qrup hazırda layihə üzərində təkmilləşdirmə işlərini aparır.

Mütəxəssislər bildirirlər ki, dövlət pensiya sistemindən fərqli olaraq, özəl fondlar topladıqları vəsaitləri investisiya edərək artırırlar. Lakin bu vəsaitlərin harada və necə yerləşdirilməsi xüsusi qaydalarla tənzimlənəcək. İnkişaf etmiş ölkələrdə olduğu kimi, Azərbaycanda da vətəndaşların vəsaitlərinin risk altında qalmaması üçün zəmanət mexanizminin tətbiqi nəzərdə tutulur.

İqtisadçı Xalid Kərimli isə qeyd edib ki, Qərb təcrübəsinə əsasən, vətəndaşlar pensiya yaşına çatdıqda toplanmış vəsaiti ya birdəfəlik götürmək, ya da hissələrə bölünmüş şəkildə almaq imkanına malik olurlar. Üstəlik, özəl pensiya sxemlərində vərəsəlik hüququ da mövcuddur.

Mütəxəssisin sözlərinə görə, əmək bazarında rəqabət mühitinə uyğun olaraq şirkətlər işçilərinə əlavə stimullar təklif edə bilər. Necə ki, əməkhaqqı paketinə bonuslar daxil edilirsə, eyni qaydada özəl pensiya sxemi də əmək müqaviləsinə əlavə edilə bilər.

Beləliklə, vətəndaşlar pensiya yaşına çatdıqda yalnız dövlət təminatı ilə kifayətlənməyəcək, həm də özəl pensiya fondlarından gəlir əldə etməklə daha yaxşı maddi şəraitə sahib ola biləcəklər.

Ətraflı süjetdə:

Telegramda izləyin