Gənclik "TikTok"da itib-batırmı? – AÇIQLAMA

Son illər sosial şəbəkələr, xüsusilə də TikTok gənclər arasında böyük populyarlıq qazanıb. Əyləncəli videolar, qısa zaman kəsiyində təqdim olunan dinamik kontent gənclərin maraq dairəsini cəzb edir. Lakin cəmiyyətdə belə bir sual yaranır: görəsən, gəncliyimiz bu platformada "itib-batır", vaxtını faydasız sərf edirmi?

Bu barədə sosioloq A.Qədirli Sonxeber.az -a açıqlama verib:

Sosioloq mövzuya münasibət bildirərək qeyd edib ki, məsələyə yalnız "mənfi" və ya "müsbət" prizmasından yanaşmaq düzgün olmaz:

TikTok sürətli istehlak mədəniyyəti formalaşdırır. Uzun müddət platformada vaxt keçirmək gənclərin dərs, inkişaf və sosial münasibətlərinə mənfi təsir göstərə bilər. Burada əsas təhlükə nəzarətsiz istifadə və asılılıq yaranmasıdır.

Digər tərəfdən TikTok gənclərə özünüifadə, bacarıqlarını nümayiş etdirmə, hətta gəlir qazanma imkanı verir. Rəqs, musiqi, məzəli videolar və qısa hekayələrlə gənclər yaradıcı düşüncələrini bölüşə bilirlər.

Problemin kökü platformanın özündə deyil, onun necə istifadə olunmasındadır. TikTok düzgün yönləndirilərsə, informasiya mübadiləsi və əyləncəli öyrənmə mühiti də ola bilər. Əks halda gənclərin real həyatdan uzaqlaşmasına səbəb olur.

Sosioloqun sözlərinə görə, əsas məsələ balansın qorunmasıdır:
"Əgər gənclər sosial şəbəkələrdən zövq almağı öyrənmə, özünü inkişaf etdirmə ilə tarazlaşdıra bilsələr, ‘itib-batma’ təhlükəsi aradan qalxar. Burada valideyn, müəllim və cəmiyyətin yönləndirici rolu böyükdür."

Yəni sualın cavabı birmənalı deyil – gənclik "TikTok"da itib-batırmı, yoxsa özünü inkişaf etdirirmi, bu onların istifadəsindən asılıdır.

Telegramda izləyin