"Möhnətov mənə dəyən 200 mindən çox ziyanı ödəmir" - "EuroHome"da kompensasiya qalmaqalı

"EuroHome" inşaat materialları bazarında kompensasiya qalmaqalı yaşanır.

Sonxeber.az "Qaynarinfo"ya istinadən xəbər verir ki, iddialara görə, "EuroHome"un sahibi Azay Möhnətov 2019-cu ildə bazarda baş vermiş yanğına görə bəzi icarədarların kompensasiyasını ödəməyib.

A.Möhnətov onlara kompensasiya ödəniləcəyini vəd etsə də, sonradan müxtəlif bəhanələrlə ödəniş etməkdən yayınıb. Məlumatda bildirilir ki, icarədarlar indiyədək Azay Möhnətovun vədlərinə inanaraq susub. Amma artıq onlar bazar sahibi barədə şikayət etmək qərarına gəliblər.

Məlumat üçün deyək ki, bazarda baş vermiş yanğından sonra icarədarlar kompensasiya tələbi ilə Bakı-Sumqayıt yolunu bağlamışdı. Həmin vaxt Binəqədi Rayon İcra Hakimiyyətinin başçısı Elxan Allahverdiyev icarədarlarla görüşmüşdü. Görüşdə əsas müzakirə mövzusu kompensasiya məsələsi olmuşdu.

Araşdırma nəticəsində məlum olub ki, kompensasiya almayan icarədarlardan biri də Rafiq Ocaqverdiyevdir. Onun bazarda elektrik materiallarının satışını həyata keçirən mağazası olub. Bildirilir ki, yanğın zamanı R.Ocaqverdiyevə 200 000 manatdan çox ziyan dəyib.

Azay Möhnətov ona dəymiş ziyanın ödəniləcəyini vəd edib. Bazar sahibi hətta dövlət qurumlarında keçirilən görüşlərdə də bununla bağlı söz verib. Lakin 6 il keçməsinə baxmayaraq, hələ də adıçəkilən icarədara kompensasiya ödənilməyib.

Yeni Azərbaycan Partiyasının (YAP) üzvü olan, sahibkarlıq fəaliyyətindən əvvəl bir sıra vəzifələrdə çalışan, məntəqə sədri kimi seçki prosesində hakim partiyanı təmsil edən R.Ocaqverdiyev məsələ ilə bağlı ölkə rəhbərliyinə və hüquq-mühafizə orqanlarına müraciət edib.

İcarədar bildirib ki, Azay Möhnətov artıq 6 ildir ona kompensasiya ödəməkdən yayınır: "Hər dəfə bir bəhanə gətirir. Əvvəl guya icarəhaqqında güzəşt etdi. Bizdən icarəhaqqı almadı. Bu, bir il çəkdi. Bir ildən sonra isə icarəhaqqını iki dəfə artırdı. Bununla da öz ziyanını kompensasiya etdi. Amma bizim kompensasiyamızı hələ də ödəmir.

Azay Möhnətov dəfələrlə mənə bildirib ki, kompensasiya ödəniləcək. Hər dəfə də bir bəhanə ilə verdiyi vədi yerinə yetirməkdən yayınıb. Təsəvvür edin, borc ödəməkdən cana doymuşuq. Mənim səhhətimdə problem yaranıb. Bir dəfə infarkt keçirmişəm. Amma bütün bunlar Azay Möhnətovun vecinə deyil. Ona görə də qərara gəldim ki, məsələ barədə ölkə rəhbərliyinə və hüquq-mühafizə orqanlarına müraciət edim".

Rafiq Ocaqverdiyev 2019-cu ildə baş vermiş yanğın hadisəsinə diqqət çəkərək bildirib ki, baş verənlərdə bilavasitə bazarın rəhbərliyi təqsirkardır. Onun sözlərinə görə, yanğın təhlükəsizliyinə ciddi riayət olunmaması yanğının genişmiqyaslı olmasını şərtləndirib.

"Bu səhlənkarlıqdan ziyan çəkən, kredit, borc ödəyən bizik. Mən Azay Möhnətovdan artıq pul istəmirəm. Mənə dəymiş ziyanı tələbi edirəm. Bazarda hər kəs də bilir ki, mənə 200 000 manatdan artıq ziyan dəyib", - deyə Rafiq Ocaqverdiyev vurğulayıb.

Onun sözlərinə görə, artıq bazarda mağazasını bağlayıb: "Borclara görə işləmək mümkün deyil. İflas həddində olduğumuz üçün mağazanı bağlamaq qərarına gəldik. Beləliklə, neçə ailə çörəkdən məhrum oldu. Azay Möhnətov öz əməlləri ilə faktiki olaraq sahibkarlıq fəaliyyətinə zərbə vurur. Halbuki ölkə rəhbərliyinin yürütdüyü siyasətdə sahibkarlığın inkişafı əsas yer tutur".

İcarədar sonda deyib ki, etdiyi müraciətlərin nəticəsi olacaq: "Azərbaycan hüquqi dövlətdir. İnanıram ki, müraciətlərimin bir nəticəsi olacaq. Ola bilər ki, Azay Möhnətov imkanlarına güvənir. Mən isə dövlətə və qanuna güvənirəm".

Telegramda izləyin