"İctimai nəqliyyatda gedişhaqqının artımı, xüsusilə, aşağı və orta gəlir qrupları üçün birbaşa sosial yük deməkdir" - AÇIQLAMA

"İctimai nəqliyyatda gedişhaqqının artımı, xüsusilə, aşağı və orta gəlir qrupları üçün birbaşa sosial yük deməkdir. Nəqliyyat xərcləri insanların gündəlik həyatının ən sabit və qaçılmaz xərclərindən sayılır. Və belə qərarlar fərqli sosial siniflərin nümayəndələrinin həyat keyfiyyətinə də fərqli formada təsir göstərir və təbəqələşməni daha da ciddiləşdirir. Orta gəlirlilər üçün bu, sadəcə gözəgörünməz xərc ola bilər, amma minimum maaşla yaşayan və ya günəmuzd işləyən insanlar üçün ciddi əlavə maddi yükdür".

Bunu Sonxeber.az-a açıqlamasında sosioloq Yusif Nəbiyev danışıb.

O, açıqlamasında qeyd edib ki, digər tərəfdən, nəqliyyat xərclərinin artması həm də sosial mobilizasiya imkanlarını məhdudlaşdırır:

"Gedişhaqqının qalxması ilə şəhər mərkəzi daha "əlçatmaz" olur və şəhərkənarı ərazilərin sakinləri üçün işə, təhsilə, gəzinti və istirahətə (bunlar nə qədər limitli olsa da) çıxışı daha da bahalaşdırır. Yəni, nə qədər kobud səslənsə də, qərar yalnız 10 qəpiklik bir qiymət artımı deyil, bu qərar "kimlər mərkəzə gedə bilər, kimlər isə kənarda qalmalıdır" probleminin struktural cavabıdır.

Yəni məsələ pulun özündən çox onun simvolik təsirindədir. Gedişhaqqının artması insanlara, dövlətin sosial həssaslığa nə qədər önəm verdiyini göstərir. Əgər bu artım nəqliyyat xidmətində ciddi keyfiyyət artımı ilə müşayiət olunmursa, köhnə xidmətə yeni qiymət biçirsə (ki bizdə bu belədir), bu, cəmiyyətdə sadəcə bahalı ictimai nəqliyyat xidməti üzərindən yox, daha dərin sosial ədalətsizlik hissindən qaynaqlanan bir etiraz yaradır.

Əlavə olaraq, nəzərə alsaq ki, alt təbəqənin zəruri ehtiyaclarının qiymətindəki bahalaşma az qala hər şeyin bahalaşmasına həm iqtisadi, həm də psixoloji zəmin yaradır, o halda mövzumuz artıq birmənalı şəkildə "10 qəpik" miqyasından çıxır və daha iriçaplı bir müstəviyə keçmiş olur".

Vüsalə İbrahimli

Telegramda izləyin