Ayda da "Wi-Fi" olacaq

ABŞ-nin kosmik agentliyi NASA "Artemis" proqramı çərçivəsində Ay səthində və orbitində olan astronavtlar, nəqliyyat vasitələri və sistemlər arasında güclü rabitə şəbəkəsi qurmaq məqsədilə "Ay Wi-Fi Giriş Nöqtəsi" yaradacaq.

"Qafqazinfo" xarici mətbuata istinadən xəbər verir ki, agentlik, "Artemis" proqramını və "Ticarət Ay Yük Xidmətləri" (CLPS) təşəbbüslərini dəstəkləmək üçün yeni nəsil "Ay Wi-Fi Giriş Nöqtəsi"ni (LWIFI-AP) hazırlaması məqsədilə "Solstar Space" şirkəti ilə 150 min dollarlıq müqavilə imzalayıb.

NASA-nın bu layihədəki məqsədi – Ay tədqiqatları sürətlənərkən qarşıdakı missiyalar üçün kritik rabitə infrastrukturunu yaratmaqdır.

"Solstar"ın hazırlayacağı sistem astronavtlar, robot sistemlər, ay nəqliyyat vasitələri və Ay orbitindəki qurğular arasında güclü ünsiyyət təmin edəcək.
Bu "Wi-Fi" sistemi, real vaxtda missiya məlumatlarının ötürülməsi, naviqasiya və elmi əməkdaşlığı dəstəkləyəcək şəkildə dizayn olunacaq.

Hazırda NASA-nın Ay missiyalarının texniki tələblərinə cavab verən kommersiya əsaslı simsiz rabitə həlli mövcud deyil.

"Solstar"ın hazırlayacağı avadanlıq radiasiyaya davamlılıq, həddindən artıq temperatur dəyişikliklərinə dözümlülük və aşağı enerji istehlakı kimi sərt şəraitdə işləyəcək şəkildə qurulacaq. Bu layihə gələcəkdə istifadəyə tam hazır bir sistemin əsasını təşkil edəcək.

Telegramda izləyin