Həbsxanadan çıxan kişi keçmiş qaynını güllələyərək öldürüb

Samsunun Bafra rayonunda təxminən bir ay əvvəl həbsxanadan çıxan şəxs keçmiş qaynını güllələyərək qətlə yetirib.

Sonxeber.az türk mediasına istinadən xəbər verir ki, hadisə Sarıkaya məhəlləsində baş verib. Məlumata görə, Kemal K. boşandığı həyat yoldaşı ilə telefonla danışdıqdan sonra onun yanına gedib. Daha sonra tarlada tütün yığan keçmiş qaynı Mustafa Özocak ilə aralarında mübahisə yaranıb. Mübahisə böyüdükdə Kemal K. üzərində gəzdirdiyi silahla Özocaka atəş açıb.

Bədəninə 8 güllə dəyən 31 yaşlı Mustafa Özocak ağır yaralanıb. Yaralı, hadisə yerinə çağırılan təcili tibbi yardım əməkdaşları tərəfindən Bafra Dövlət Xəstəxanasına aparılsa da, həkimlərin səylərinə baxmayaraq həyatını itirib.

Hadisədən sonra qaçan şübhəlinin tutulması üçün jandarma və polis əməkdaşları genişmiqyaslı axtarış əməliyyatına başlayıblar.

Məlum olub ki, Kemal K. təxminən bir ay əvvəl həbsxanadan azadlığa çıxıb.

Telegramda izləyin