Bələdiyyəyə məxsus çörək zavodunda ölü siçanlar aşkarlandı - VİDEO

Denizlinin Merkezefendi Bələdiyyəsinə məxsus "xalq çörəyi" zavodunda siçanların dolaşdığına dair görüntülərin sosial mediada yayılmasından sonra müəssisədə yoxlama aparılıb.

Sonxeber.az türk mediasına istinadən xəbər verir ki, yoxlama nəticəsində gigiyena qaydalarına əməl olunmadığı müəyyən edildiyinə görə zavodun fəaliyyəti dayandırılıb.

İl Kənd Təsərrüfatı və Meşə İdarəsinin əməkdaşları Bozburun məhəlləsində yerləşən çörək zavoduna gecə saatlarında baxış keçiriblər. Yoxlama zamanı döşəmədə ölü siçan aşkarlanıb, həmçinin radiatorların kifləndiyi müəyyən edilib. Mütəxəssislər xəmir yoğurma aparatının yerləşdiyi sahə də daxil olmaqla müxtəlif bölmələrdə sanitar vəziyyəti araşdırıblar.

Faktla bağlı "Baytarlıq Xidməti, Bitki Sağlamlığı, Qida və Yem haqqında" 5996 saylı qanuna əsasən rəsmi protokol tərtib olunub.

Araşdırma nəticəsində müəssisədə ümumi gigiyena qaydalarına əməl edilmədiyi təsdiqlənib. İdarəçilərə rəsmi bildiriş təqdim olunub və insan sağlamlığı ilə qida təhlükəsizliyi üçün risk yarandığı müəyyən edildiyindən zavodun fəaliyyəti bütün çatışmazlıqlar aradan qaldırılana qədər dayandırılıb.

Qanun pozuntusu ilə bağlı inzibati tədbirlərin davam etdiyi bildirilib.

Telegramda izləyin