Atanın marketdə oğluna şiddət göstərməsi sosial mediada qəzəb doğurdu - VİDEO

Türkiyənin Eskişehir şəhərində ata tərəfindən azyaşlı oğluna göstərilən şiddət görüntüləri sosial şəbəkələrdə böyük narazılıq yaradıb.

Sonxeber.az türk mediasına istinadən xəbər verir ki,hadisə Odunpazarı rayonunun Emek məhəlləsində, Ziya Gökalp küçəsində yerləşən bir marketdə baş verib.

Məlumata görə, 49 yaşlı C.E. adlı şəxs 5 yaşlı oğlunu da götürərək alış-veriş üçün marketə gedib. Qısa müddət sonra uşaq atasının arxasınca gələrək onun kürəyinə toxunub. Buna qəzəblənən ata uşağına təpik zərbələri endirib. Uşaq yerə yıxıldıqdan sonra da o, şiddət göstərməyə davam edib. Hadisəyə market işçiləri müdaxilə edərək uşağı atasının əlindən alıblar.

Marketin təhlükəsizlik kamerasına düşən bu kadrlar sosial mediada yayıldıqdan sonra ictimai qəzəbə səbəb olub. Görüntülərdə C.E.-nin 5 yaşlı oğluna dəfələrlə təpik vurduğu, uşağın yerə yıxılmasına baxmayaraq döyməyə davam etdiyi açıq şəkildə görünür.

Baş verənlərdən sonra Eskişehir Respublika Prokurorluğu hadisə ilə bağlı istintaq başladıb, ata isə polis tərəfindən saxlanılaraq bölməyə aparılıb.

C.E. polisə verdiyi ifadəsində belə deyib:

"Uşağım çox hərəkətlidir, marketdə də çox qaçırdı. Ani əsəb partlaması yaşadım və vurdum. Peşmanam."

İstintaq çərçivəsində dindirilməsi tamamlanan ata bu gün məhkəməyə çıxarılıb. Hadisə Türkiyədə uşaq zorakılığına qarşı sərt tədbirlər görülməsi mövzusunu yenidən gündəmə gətirib.

Telegramda izləyin