Hərəkətdə olan motosiklet alov aldı – sürücü sağ qaldı, motosiklet kül oldu

İstanbulun Arnavutköy rayonunda hərəkətdə olan bir motosiklet alov içində yanıb.

Sonxeber.az türk mediasına istinadən xəbər verir ki, hadisə nəticəsində motosiklet tamamilə yararsız hala düşüb.

Hadisə Hoca Ahmet Yesevi prospektində baş verib. Məlumata görə, hərəkətdə olan motosikletin mühərrik hissəsindən qəfildən tüstü qalxıb. Sürücü motosikleti saxlayaraq uzaqlaşdıqdan qısa müddət sonra alov bütün nəqliyyat vasitəsini bürüyüb.

Yanğını görən sakinlər öz imkanları ilə alovları söndürməyə çalışıblar, lakin məlumat verildikdən sonra hadisə yerinə yanğınsöndürənlər cəlb olunub. Komandaların müdaxiləsi nəticəsində yanğın söndürülüb, lakin motosiklet tamamilə yanaraq dəmir yığınına çevrilib.

Yanğın anı ətrafdakı vətəndaşlar tərəfindən mobil telefonla lentə alınıb.

Telegramda izləyin