Sərxoş sürücü vəsiqə istəyən polisə təpik atdı - VİDEO

Aksarayda maddi ziyanla nəticələnən yol qəzasından sonra hadisə yerindən qaçan sərxoş sürücü və onun iki yaxın qohumu polis əməkdaşlarının qanuni tələbinə tabe olmamaqla gündəmə gəlib.

Sonxeber.az türk mediasına istinadən xəbər verir ki, hadisə Kılıçaslan məhəlləsində, Kurtuluş dairəsi yaxınlığında saat 20:30 radələrində baş verib.

İdarə etdiyi yüngül kommersiya avtomobili ilə 40 DL 670 dövlət nömrə nişanlı minik maşınına arxadan çırpılan Serkan S. avtomobildən düşərək hadisə yerindən uzaqlaşıb. Şahidlərin məlumatı əsasında polis əməkdaşları hadisə yerinə cəlb olunub.

Bir müddət sonra sürücü Serkan S. və onun yaxınları – Sait S. və Rahmi S. hadisə yerinə qayıdıb. Polis əməkdaşları onların sənədlərini təqdim etməsini tələb etsə də, qarşı tərəf buna müqavimət göstərib. Bu zaman Sait S., ərazidə olan Təhlükəsizliyin Təşkili və Nəzarəti Şöbəsinin rəisi Gürsoy Yalvaça təpiklə hücum edib.

Polis əməkdaşları vəziyyəti nəzarətə almaq üçün bibər qazından istifadə edərək üç nəfəri zərərsizləşdirib və onları saxlayıb. Sürücü Serkan S.-nin keçirilən tibbi yoxlamasında onun 2,60 promil alkoqollu olduğu müəyyən edilib.

Təpiklə hücuma məruz qalan şöbə rəisi Gürsoy Yalvaç xəstəxanada müalicə olunub. Hadisə ilə bağlı araşdırma davam edir.

Telegramda izləyin