Sərxoş sürücü vəsiqə istəyən polisə sosial media hesabını göstərdi - VİDEO

Kayseri İl Emniyyət Müdürlüğünün Trafik Nəzarət Şöbəsi yol hərəkətində təhlükəsizliyi təmin etmək məqsədilə reydlərini davam etdirir.

Sonxeber.az türk mediasına istinadən xəbər verir ki, Melikgazi rayonunun Cami Kebir məhəlləsində Sur Caddesi üzərində aparılan yoxlama zamanı 31 AAH 648 nömrə nişanlı avtomobilin sürücüsü M.K. saxlanılıb.

Sürücünün ayaqda durmaqda çətinlik çəkdiyi müşahidə olunub və aparılan alkoqol testi zamanı onun sərxoş olduğu müəyyən edilib. Polis əməkdaşları ona qarşı tədbir görmək üçün sürücülük vəsiqəsini tələb etdikdə, M.K. yanında sənəd olmadığını, lakin sosial media hesabını göstərə biləcəyini deyib.

Sürücünün kimliyi daha sonra müəyyən edilib. Məlum olub ki, M.K.-nın sürücülük vəsiqəsi əvvəllər alkoqol testindən imtina etdiyi üçün 2 il müddətinə əlindən alınıb. Bu səbəblə onun hazırda vəsiqəsiz avtomobil idarə etdiyi təsdiqlənib.

M.K.-ya "alkoqollu vəziyyətdə avtomobil idarə etmək" və "vəsiqəsiz avtomobil sürmək" maddələri üzrə ümumilikdə 46 min 621 TL məbləğində inzibati cərimə tətbiq olunub.

Telegramda izləyin