Gec danışan uşaqlarla bağlı mütəxəsisdən XƏBƏRDARLIQ

"Nitqdə rast gəlinən problemləri təkcə şifahi nitqdə yox, həmçinin yazılı nitqdə, yəni öyrənmə, oxuma, yazma və yeni informasiyaların analizi zamanı da çətinliklərə səbəb olacaq".

Milli.Az xəbər verir ki, bu fikri Səhiyyə Nazirliyinin Psixi Sağlamlıq Mərkəzinin loqopedi Aygün Ələkbərova canlı yayımda səsləndirib.

Onun sözlərinə görə, bioloji faktor kimi uşağın keçirdiyi xəstəliklər, psixoloji-sosioloji amillər kimi isə ailədəki davranış modelləri və uşağın sosial mühiti mühüm rol oynayır:

"0-1 yaş dövründə körpə az səslər çıxararsa, səs-küyünü hiss etməzsə, qığıldama təqlidi olmazsa, monoton və nadir səslər çıxararsa, 1-3 yaş arası ətrafdakı səslərə və ya nitqə reaksiya verməzsə, müraciət olunan nitqi anlamazsa, söz ehtiyatını artırmazsa, mövcud söz ethiyatını məqsədli şəkildə istifadə etmirsə, sadədən mürəkkəbə doğru cümlələr qurmazsa, hər yaşa uyğun səsləri düzgün tələffüz etməzsə, mütəxəssislərə müraciət məsləhət görülür. Erkən müdaxilə korreksiya işin effektivliyini dəstəkləyir. Uşaq 3 yaşdan etibarən sərbəst danışmağa başlayır. Bu dövrdən başlayaraq artıq 2-3 sözlük cümlələr qura və fikrini ifadə edə bilir", - deyə loqoped bildirib.

A.Ələkbərova qeyd edib ki, uşaqla 1 yaşına qədər şirin və yumşaq tonda danışmaq olar:

"Lakin 1 yaşdan sonra valideynlər artıq fikirlərini aydın və səlis şəkildə ifadə etməlidirlər. Bu, uşağın düzgün nitq inkişafı üçün mühüm əhəmiyyət daşıyır".

Telegramda izləyin