Tələbə yataqxanasında çalışan sərxoş nəzarətçi ayağı düyü qazanının içində yatarkən yaxalandı

Hindistanın Telangana ştatının Sangareddy bölgəsində yerləşən Dövlət Politexnik Kollecinin SC/ST kişi tələbə yataqxanasında yaşanan qalmaqal həm tələbələrin, həm də rəsmilərin ciddi narazılığına səbəb olub.

Sonxeber.az xarici mediaya istinadən xəbər verir ki, 12 noyabrda baş verən hadisədə yataqxanada çalışan nəzarətçi Şekharın növbə zamanı sərxoş halda yatdığı və ayağını böyük bir düyü qazanının içinə saldığı üzə çıxıb. Tələbələr tərəfindən çəkilən görüntülər qısa müddətdə sosial şəbəkələrdə yayılıb və bundan sonra dərhal araşdırma başlanılıb.

Görüntülərin yayılmasından sonra Sangareddy Rayon İcra Hakimiyyətinin rəhbəri hadisə ilə bağlı təcili araşdırma aparılması göstərişi verib. Araşdırma tamamlandıqdan sonra hazırlanan hesabat icra başçısına təqdim edilib.

Açıqlamada tələbələrin sağlamlığını və təhlükəsizliyini riskə atan bu kimi davranışlara qətiyyən dözümlülük göstərilməyəcəyi vurğulanıb.

Hadisə bölgədə dövlət qurumlarında nəzarət və təhlükəsizlik tədbirlərinin yenidən nəzərdən keçirilməsi ilə bağlı müzakirələri də gündəmə gətirib.

Telegramda izləyin