Avtobusda gənc oğlan bıçaqlanaraq qətlə yetirildi – Şübhəli saxlanılıb

Konyanın Karatay rayonunun Tatlıcak məhəlləsində bələdiyyə avtobusunda baş verən qanlı hadisə 21 yaşlı Kadirhan Öztürkün həyatına son qoyub.

Sonxeber.az türk mediasına istinadən xəbər verir ki, hadisənin "yan baxma" mübahisəsi səbəbindən baş verdiyi iddia edilir.

Hadisə Konya–Adana yolunda şəhər içi sərnişin daşıyan bələdiyyə avtobusunda saat 16:30 radələrində qeydə alınıb. Eyni məhəllədə yaşayan 33 yaşlı Vahdettin Işık avtobusda aralarında mübahisə düşən Kadirhan Öztürkə bıçaqla hücum edib. Gənc, həyat yoldaşının gözü önündə qarın nahiyəsindən bıçaqlanaraq yerə yıxılıb.

Səs-küyü eşidən sürücü avtobusu dərhal dayandırıb. Bu vəziyyətdən istifadə edən Işık avtobusdan düşərək hadisə yerindən qaçıb. Hadisə ilə bağlı polis və təcili tibbi yardım əməkdaşları əraziyə cəlb olunub. Yaralı Öztürk xəstəxanaya çatdırılsa da, həkimlərin səylərinə baxmayaraq günorta saatlarında həyatını itirib.

Qaçan Vahdettin Işık Cinayət Axtarış Şöbəsinin əməkdaşları tərəfindən Tatlıcak məhəlləsində cinayətdə istifadə olunan bıçaqla birlikdə saxlanılıb. Onun daha əvvəl "mülkiyyətə ziyan vurma" və "qəsdən xəsarət yetirmə" kimi cinayətlərdən polis qeydiyyatında olduğu bildirilib. Şübhəli ifadəsində mübahisənin "yan baxma" səbəbindən başladığını deyib. Işık, polis idarəsindəki prosedurlardan sonra məhkəməyə çıxarılaraq həbs edilib.

Telegramda izləyin