Ayı 70 yaşlı kişiyə hücum edib görün nə hala saldı!

Ağrının Doğubayazıt rayonunda dəhşətli hadisə baş verib.

Sonxeber.az türk mediasına istinadən xəbər verir ki, Yukarı Güngören kəndində heyvan otaran 70 yaşlı Halit Zengel ayının hücumuna məruz qalıb və ciddi şəkildə yaralanıb.

Hadisə ötən şənbə günü günorta saatlarında baş verib. Zengel heyvanlarını otardığı vaxt ağaclıq sahədən çıxan ayı ona hücum edib. Ayı pəncəsi ilə Zengel’in üz nahiyəsinə zərbələr endirib və daha sonra ərazidən uzaqlaşıb. Yaralı kişi mobil telefonu ilə oğluna zəng edərək kömək istəyib.

Təcili yardım vasitəsilə Doğubayazıt Dövlət Xəstəxanasına aparılan Zengel daha sonra Erzurum Atatürk Universiteti Araşdırma Xəstəxanasının Çənə Cərrahiyyəsi şöbəsinə köçürülüb. Müayinədə onun almacıq sümüyünün qopduğu və üz sümüklərinin zədələndiyi müəyyən edilib. Prof. Dr. Ümit Ertaş tərəfindən dərhal əməliyyata alınan Zengel’in zədələnmiş sümükləri və yumşaq toxumaları bərpa edilib.

Prof. Dr. Ümit Ertaş açıqlamasında bildirib: "Ayı pəncəsi ilə almacıq sümüyü tamamilə qopmuşdu və üz sümüklərində ciddi zədələr var idi. Əməliyyatla sümükləri əvvəlki vəziyyətinə qaytardıq, toxuma onarımı da edildi. Pasiyent hazırda yaxşıdır. Üç günlük infeksiya nəzarətindən sonra evə buraxılacaq. Gətirildiyi zaman üzündə böyük kəsiklər və yırtıqlar vardı, hamısı düzgün şəkildə bərpa edildi. Üz sinirində zədələnmə olmadığı üçün xəstə şanslıdır."

Professor həmçinin klinikaya gələn bu tip hadisələrin artdığını söyləyib: "Bu, bizə gətirilən 5-ci vəhşi heyvan hücumu hadisəsidir. Onlardan 4-ü ayı, 1-i isə canavar hücumudur. Noyabr ayları ayıların qış yuxusundan əvvəl qida axtardığı dövr olduğu üçün bu cür hadisələr artır."

Çənə cərrahiyyəsi şöbəsində müalicəsi davam edən Halit Zengel isə baş verənləri belə danışıb: "Dağda heyvan otarırdım. Ayı birdən-birə hücum etdi. Pəncələri ilə üzümə vurdu və sonra uzaqlaşdı. Mən də oğluma zəng edib kömək istədim."

Hadisə ilə bağlı araşdırma aparılır.

Telegramda izləyin