"Ağdam artıq qayıdıb, həm də əvvəlkindən güclü formada!" - AÇIQLAMA

"Ağdam bu gün təkcə işğaldan azad olunmuş bir torpaq deyil, dövlətçilik iradəsinin, siyasi qətiyyətin və ordunun sözünü yerə salmayan gücünün simvoludur" - bu sözləri Sonxeber.az -a açıqlama verən politoloq Tural İsmayılov deyib:

"Bu tarixi gün Azərbaycan üçün göstərdi ki, torpaq itiriləndə faciə olur, amma geri alınanda millətin yaddaşı yenidən dirçəlir. Ağdamın dirçəldilməsi həm də böyük strateji mesajdır - "biz təkcə azad etmirik, həm də qururuq" deyən dövlət modeli ortaya çıxır.

İndi Ağdamda gedən quruculuq işləri regionun gələcəyini müəyyən edən yeni planlaşdırma mərhələsidir və bu proses Azərbaycanın modern dövlətçilik ənənəsinin real təcəssümüdür. Ağdamın yenidən şəhər kimi ayağa qalxması, "ruh şəhər" obrazından çıxması bütün Cənubi Qafqaza siyasi mesaj verir: burdan geri dönüş yoxdur. Bu gün Ağdam yeni kommunikasiya xətlərinin, iqtisadi layihələrin və təhlükəsizlik arxitekturasının mərkəzinə çevrilməkdədir. Elə buna görə də Ağdam Günü, sadəcə təqvim xatırlatması yox, milli qürur kodlarının yenilənməsi kimidir.

Siyasi baxımdan bu gün Azərbaycan dövlətinin post-münaqişə mərhələdə nə qədər planlı, nə qədər tənzimləyən və nə qədər strateji düşündüyünü təsdiqləyir. Ağdamın taleyi həm də regional güc balansında Azərbaycanın üstün mövqeyini daha da möhkəmləndirir. Bu gün oradakı hər inşaat, hər yol, hər məktəb siyasi xəttin — "öz torpağında söz sahibisən" prinsipinin praktiki təsdiqidir.

Ağdam Günü həm də gələcək nəsillərə verilən mesajdır: tarixi yenidən yazmaq mümkündür, yetər ki, iradə, dövlətçilik yaddaşı və milli birlik olsun. Bu gün Ağdamda gördüklərimiz ənənəni qoruyub müasirliyi qurmağın ən real nümunəsidir. Və sonda bir həqiqət var — Ağdam artıq qayıdıb, həm də əvvəlkindən güclü formada; bu isə Azərbaycanın gələcəyi üçün strateji üstünlükdür, siyasi iradənin isə ən sarsılmaz sübutu".

Telegramda izləyin