"Dövlətə xəyanət, xalqa arxa çevirmək ən ağır cinayətdir" - DEPUTAT

"Bu gün Azərbaycan regionda aparıcı mövqeyi ilə tanınan, qlobal səviyyədə ehtiramla qəbul edilən dövlətdir. Ulu Öndər Heydər Əliyevin müəyyən etdiyi siyasi kursun Prezident İlham Əliyevin rəhbərliyi ilə uğurla davam etdirilməsi respublikamızın sürətli inkişafını, xalqımızın sosial rifahının yüksəldilməsini və torpaqlarımızın işğaldan azad olunmasını təmin edib. Ərazi bütövlüyümüz bərpa edilib, torpaqlarımız üzərində milli suverenliyimiz təmin olunub. Bu gün dövlətimiz azad və müstəqildir. Azərbaycan xalqının öz tarixinin uğurlu davamı, Ali Baş Komandan İlham Əliyevin illərlə apardığı düşünülmüş və strateji siyasətinin, güclü ordumuzun və xalqımızın birliyinin nəticəsidir. Azərbaycan xalqı bu uğurlarla haqlı olaraq qürur duyur. Təəssüflər olsun ki, belə bir vaxtda da həm xaricdə, həm də daxildə ölkəmizə qarşı yönəlmiş məkrli qüvvələr var. Amma onlar bilməlidirlər ki, Azərbaycan dövləti güclüdür, hüquq-mühafizə orqanlarımız ayıq-sayıqdır və istənilən təxribatın qarşısını almağa qadirdirlər. Ölkə rəhbərinin siyasi iradəsi və düzgün idarəçiliyi nəticəsində bu kimi xəyanətlərə yer olmayacaq. Dövlətə, xalqa, vətənə xəyanət edən hər bir şəxs qanun qarşısında cavab verəcək və layiqli cəzasını alacaq".

Bu sözləri Sonxeber.az-a açıqlamasında Milli Məclisin deputatı Tamam Cəfərova deyib.

O, açıqlamasında qeyd edib ki, son günlər ölkə ictimaiyyətinin diqqət mərkəzində olan əsas məsələ - Azərbaycan Xalq Cəbhəsi Partiyasının (AXCP) sədri Əli Kərimli və bir neçə partiya funksionerinin saxlanılması ilə bağlı aparılan istintaq tədbirləridir:

"Bu proseslər dövlətin hüquq və təhlükəsizlik siyasətinin tərkib hissəsi olaraq qiymətləndirilir. Cari ilin oktyabr ayında Ramiz Mehdiyevlə bağlı başlanmış istintaq çərçivəsində müxtəlif şəxslərin ifadələrinin alınması, müəyyən istiqamətlər üzrə araşdırmaların aparılması və ayrı-ayrı ünvanlarda axtarış tədbirlərinin keçirilməsi barədə rəsmi məlumatlar yayımlanıb. Bu istintaqın bir hissəsi kimi AXCP sədri Əli Kərimli ilə bağlı da prosedurlar həyata keçirilib, onun evində axtarış aparılıb. Aşkar olunan materiallar arasında "Milyarderlər İttifaqı" ilə əlaqələrə dair faktlar, Ramiz Mehdiyev tərəfindən yazılmış məktubun KİV-də olmayan ilkin variantı və digər sənədlər tapılıb. DTX-nın Əli Kərimlinin və onun müşavirinin evində axtarışlar aparması AXCP sədrinin dövlət çevrilişinə cəhd planlarındakı yeri və rolu barədə ciddi sübutlara malik olduğunu göstərir.

"Ramiz Mehdiyevin işi" ilə bağlı aparılan istintaq tədbirləri çərçivəsində Əli Kərimlinin və onun ətrafındakı şəxslərin əməllərinin yeni detallarının üzə çıxarılması bir daha göstərir ki, bunların bütün fəaliyyəti antikonstitusion hərəkətlərdən ibarətdir və dövlətə qarşı yönəlib. Hələ 2013-cü ildə keçirilən prezident seçkiləri ərəfəsində yaradılmış "Milli Şura" adlanan qurumun məhz Rusiyadan idarə olunduğunu görmək mümkün idi. Çünki Onlar Rusiya vətəndaşı olan Rüstəm İbrahimbəyovu prezidentliyə namizəd göstərmişdilər və bunu məhz Rusiyanın tapşırığı ilə etmişdilər. O zaman seçki kampaniyasının gedişində "Milli Şura" adlı qurumun fitnəkarlığı, antiazərbaycançı mərkəzlərin sifarişlərini yerinə yetirdiyi aydın görünməkdə idi. Bu qurumda birləşən Əli Kərimli, Cəmil Həsənli və digərləri seçki prosesinə və ölkəmizin maraqlarına zərbə vurmağa çalışmaqla məşğul idilər. Artıq AXCP sədri Əli Kərimlinin, Milli Şuranın üzvü Gültəkin Hacıbəylinin Ramiz Mehdiyevin tapşırıqlarını yerinə yetirməsi, hər iki şəxsin timsalında AXCP və Milli Şuranı hakimiyyətə təzyiq aləti kimi əlində saxlaması heç kəsə sirr deyil. Demək ki, mənzərə tam aydındır: Rusiya Ramiz Mehdiyev vasitəsilə, Ramiz Mehdiyev isə AXCP və Milli Şura xətti ilə hakimiyyəti daimi təzyiq altında saxlamaq, mühüm proseslər zamanı siyasi güzəştlərə məcbur etmək, hətta Moskvanın iradəsi ilə dövlət çevrilişinə cəhd etmək və s.kimi işbirliyi piramidası təşkil edildiyi tam aydınlaşır. Rusiyanın Ramiz Mehdiyevlə əlaqələri və xəbərləşmə metodları xüsusi xidmət orqanlarına bəllidir. Əlbəttə ki, bu deyilənləri sübut edəcək faktlar da var.
Məsələn, Ramiz Mehdiyev vəzifədə olduğu müddətdə AXCP və Milli Şura hər 3 aydan bir mitinq, aksiya təşkil edərdi. Lakin 2019-cu ildə Ramiz Mehdiyev vəzifəsindən azad olunduqdan sonra AXCP və Milli Şura bir dəfə də olsun nə mitinq, nə də aksiya keçirdi. Eyni zamanda, Əli Kərimli heç zaman hər hansı bir çıxışında birbaşa Ramiz Mehdiyevi tənqid etməyib. Bütün aqressiya və tənqidləri, trol hücumlarını, sosial şəbəkə paylaşımlarını Prezident İlham Əliyevə qarşı istiqamətləndirib. Heç şübhəsiz ki, bunu da Ramiz Mehdiyevin təlimatına uyğun edib. Əgər belə olmasaydı, nə üçün Əli Kərimli dəfələrlə Ramiz Mehdiyevi müdafiə edən çıxışlar edib?
Gültəkin Hacıbəyliyə gəldikdə isə,öncə sual olunmalıdır ki, hakimiyyətin tərəfdarlarından olan, vaxt var idi Prezident seçkilərində cənab İlham Əliyevi müdafiə edən, onun haqqında uzun çıxışlar quran Gültəkin Hacıbəyli necə oldu ki, müxalif düşərgəyə keçdi? Yaxud, onun bütün karyerası boyunca keçdiyi yolu bilən Əli Kərimli niyə belə asanlıqla onu yaxınına buraxdı? Hansı xidmətlərinə görə o Milli Şuraya qəbul olundu? Əlbəttə ki, bütün bu sualların cavabı bir daha Ramiz Mehdiyev koordinatını bizə göstərir.

Əslində, 2003-cü ildə Gürcüstandan, 2004-cü ildə Ukraynadan, 2005-ci ildə Qırğızıstandan, 2012-ci ildə "Ərəb baharı"ndan sonra da Qərbin dəstəyini ala bilməyən Əli Kərimlinin "Qafqaz baharı" fiaskoya uğradı və o ümidini Rusiyaya, əlaqələndirici və siyasi-ideoloji, maddi dəstəkçi kimi Ramiz Mehdiyevə bağladı. Məlum olduğu kimi o, bir müddət sonra Müsavatı və digər müxalifət partiyalarını sıxışdırıb Milli Şuradan uzaqlaşdırdı və Rusiyanın, Ramiz Mehdiyevin tək "ortağına" çevrildi. Çünki Rusiyadan gələn sifarişlər və Ramiz Mehdiyevin ssenariləşdirdiyi mitinqlər, aksiyalar əməlli-başlı böyük gəlir mənbəyi idi. Lakin xalq-hakimiyyət vəhdəti bu mənfur planı puça çıxardı.
Millət vəkili vurğulayıb ki, ümumiyyətlə, Əli Kərimlinin fəaliyyəti hər zaman antimilli müstəvidə olub. Bu tipli adamlar öz əməlləri ilə dövlətə və xalqa müxalif olublar. Onlar respublikamıza düşmən mövqedə olan xarici siyasi mərkəzlərlə əməkdaşlıq ediblər, onların tapşrıqlarını yerinə yetiriblər. Müxtəlif hadisələr zamanı, o cümlədən Azərbaycan beynəlxalq uğurlara imza atanda, respublikamızda seçkilər və ya mühüm beynəlxalq tədbir keçiriləndə bu qaragüruh qrup xaricdən aldığı təlimatlar əsasında respublikamıza qarşı qarayaxma kampaniyası həyata keçirməyə cəhd göstərib. Amma hər dəfə iflasa uğrayıb, ifşa olunub. Məsələn, Vətən müharibəsi dövründə ölkədə olan bütün siyasi qüvvələr milli maraqlar ətrafında birləşdiyi halda Azərbaycan Xalq Cəbhəsi Partiyası adlanan qurum milli birlikdən imtina etdi.

Rusiyanın çirkin planının ifşası fonunda Ramiz Mehdiyev-AXCP-"Milli Şura" üçbucağının da xəyanətləri artıq sübuta yetirilməkdədir: "DTX dövlət çevrilişinə cəhd planında yalnız Ramiz Mehdiyevin, onun əlaltıları olan AXCP və "Milli Şura" ilə oyunlarını ifşa etmir, eyni zamanda, Rusiyadakı bəzi dairələrin perspektivdə Azərbaycanda təxribat, siyasi qarşıdurma törədilməsi, ictimai sabitliyin pozulması planlarında Əli Kərimlidən istifadə imkanlarını da məhdudlaşdırmaqdadır. Daha doğrusu, Rusiyanın Ukrayna ilə müharibə bitdikdən sonra Qafqaz üzərində təsir dairəsini yenidən bərpa etmək cəhdləri çərçivəsində Ramiz Mehdiyevə bağlı qüvvələrdən istifadə edəcəyi, qeyd olunan prosesdə radikal davranışları ilə daim seçilən, Azərbaycanın dövlət maraqlarına qarşı hər zaman xəyanətkar mövqedə olan AXCP-nin öndə gedəcəyi də istisna edilmir. Qeyd olunan səbəbdən dövlətə, Vətənə xəyanət yolunu tutan qüvvələrin vaxtında zərərsizləşdirilməsi dövlət təhlükəsizliyi üçün mühüm əhəmiyyət daşıyır".

Deputat onu da əlavə edib ki, dövlətə və xalqa xəyanət yolunu tutmuş AXCP kimi partiyaların qapadılması məsələsi də birmənalı şəkildə gündəmdə olmalıdır:

"Ramiz Mehdiyev, Əli Kərimli və onların ətrafında olan bəzi şəxslərin dövlətə xəyanət yolu tutması, hakimiyyəti zorla ələ keçirməyə cəhd etməsi xalq tərəfindən qətiyyətlə pislənir və nifrətlə qarşılanır. İstintaq orqanları tərəfindən aparılan araşdırmalar göstərir ki, bu cəhdlər realdır və istintaqa cəlb olunan şəxslərin ifadələri, əldə olunan sübutlar bunu tam aydın şəkildə təsdiqləyir. Dövlətə xəyanət, xalqa arxa çevirmək ən ağır cinayətdir və bu cinayətin bağışlanması mümkün deyil. Xalq onların saxta simasını bir daha gördü. Müxalifətçilik vətənə, xalqa və milli maraqlara qarşı olmur. Ramiz Mehdiyevin, Əli Kərimlinin və onun qrupunun bu tipli fəaliyyəti təmsil etdiyi xalqa və vətəndaşı olduğu dövlətə xəyanətdən başqa bir şey deyil. Bu cür əməllər isə bağışlanmazdır".

Telegramda izləyin