Qurmanlar üçün cənnət: Yeməksevərlər üçün dünyanın ən yaxşı 10 şəhəri

Qastronomik turizm sürətlə inkişaf edir: turizm saytı "Acorn"un araşdırmasına görə, səyahətçilərin üçdə ikisi artıq istirahət yerini kulinariya təcrübələrinə əsaslanaraq seçir.

Qaynarinfo xəbər verir ki, mütəxəssislər kulinariya kurslarının əlçatanlığını, reytinqləri, qiymətləri və qlobal axtarış tələbatını təhlil edərək dünyanın qastronomiya üzrə ən yaxşı 10 şəhərini müəyyənləşdirib.

"DailyMail" yazır ki, siyahıda İtaliya dominantlıq edir: ölkənin beş şəhəri dadlı yeməyi sevənlər üçün dünyanın ən yaxşı istiqamətləri arasında göstərilib.

Birinci yeri Florensiya tutur və nəşr bunun kifayət qədər əsaslı səbəbləri olduğunu qeyd edir. Şəhər 231 kulinariya master-klası təklif edir və onların 74,5 faizi dörd ulduz və ya daha yüksək qiymətləndirilib.

Florensiya "Bistekka alla Fiorentina" - qalın sümüküstü ət bifteki kimi məşhur ət yeməkləri ilə tanınır. Daha bir regional delikates isə mal mədəsindən hazırlanan unikal sendviç lampredottodur. Yerli dondurmanı sınamamaq olmaz və söz mövzusu İtaliya olunca pizza və pasta da hər zaman əla olur.

Siyahının ikinci pilləsində 50 kulinariya kursu və otellərin 88 faizinin dörd ulduz və daha yüksək reytinq aldığı Siciliyanın paytaxtı Palermo yer alır.

Üçüncü yerdə özünün məşhur bolonez sousu ilə tanınan Boloniya qərarlaşıb.

Qastronomik turizm üçün ən yaxşı şəhərlərin tam siyahısı belədir:

1. Florensiya (İtaliya)
2. Palermo (İtaliya)
3. Bolonya (İtaliya)
4. Lissabon (Portuqaliya)
5. Roma (İtaliya)
6. Brüssel (Belçika)
7. Barselona (İspaniya)
8. Venesiya (İtaliya)
9. Osaka (Yaponiya)
10. Hue (Vyetnam)

"Titan Travel" şirkətinin məhsul meneceri Kesssi Striklend deyir: "Bu gün səyahətçilər sadəcə görməli yerləri gəzməklə kifayətlənmək istəmir. Onlar gedilən yeri həqiqətən hiss etmək istəyir. Yemək bunun ən yaxşı yoludur - çünki sizi birbaşa yerli həyat və ənənələrlə əlaqələndirir... Ən dəyərli təcrübələr adətən yerli aşpazlarla və ailəvi mətbəxlərlə bağlı olur: burada siz yalnız reseptləri deyil, onların arxasındakı hekayələri də öyrənirsiniz".

Telegramda izləyin