"Prezident İlham Əliyevin Slovakiyaya səfərinin siyasi-iqtisadi üstünlükləri ilə yanaşı, diplomatik əhəmiyyəti də yüksəkdir" - DEPUTAT

"Dünən Azərbaycan Prezidenti İlham Əliyevin Slovakiyaya ilk rəsmi səfəri baş tutub. Bu səfər hər iki ölkə arasındakı münasibətlərin yeni mərhələyə keçdiyini göstərən mühüm tarixi hadisədir. Prezident İlham Əliyevin Slovakiyaya səfəri bu ölkənin Prezidentinin dəvəti ilə gerçəkləşib. Bu səfər iki ölkə arasında yüksək səviyyəli siyasi dialoqdan xəbər verir".

Bu sözləri Sonxeber.az-a Milli Məclisin deputatı Müşfiq Cəfərov danışıb.

O, açıqlamasında qeyd edib ki, səfər zamanı enerji təhlükəsizliyi, müdafiə sənayesi, nəqliyyat-logistika və rəqəmsal transformasiya kimi strateji sahələrdə real əməkdaşlıqlar müzakirə olunub:

"Azərbaycan Respublikasının Prezidenti İlham Əliyevin Slovakiyaya səfərinin siyasi-iqtisadi üstünlükləri ilə yanaşı, diplomatik əhəmiyyəti də yüksəkdir. Düşünürəm ki, bu səfər çərçivəsində siyasi və iqtisadi əməkdaşlıqdan əlavə, humanitar və mədəni sahələri də əhatə edən məsələlər üzrə də razılaşmalar əldə olunacaqdır.

Azərbaycanın Avropa məkanında mövqeyini gücləndirməsi və regional layihələrdə iştirakını artırması üçün belə səfərlər böyük əhəmiyyət daşıyır. Prezident İlham Əliyevin Slovakiyaya səfəri Azərbaycanın Avropa İttifaqı ilə əlaqələrinin gücləndirilməsi, ikitərəfli iqtisadi və enerji əməkdaşlığının dərinləşdirilməsi və Cənubi Qafqazda regional sabitliyin dəstəklənməsi baxımından strateji mahiyyətə malikdir.

Azərbaycan son illər Avropa üçün etibarlı qaz mənbəyinə çevrilib. 2023-2024-cü illərdə ilk dəfə Azərbaycan qazı Slovakiyaya çatdırılıb. Azərbaycan hazırda 14 ölkəyə qaz ixrac edir və 25 milyard kubmetr həcmindəki ixracın yarısı Avropaya yönəldilir. Bu amil Azərbaycanın təkcə enerji ölkəsi kimi deyil, Avropanın enerji təhlükəsizliyində strateji tərəfdaş kimi rolunu daha da möhkəmləndirir".

Vüsalə İbrahimli

Telegramda izləyin