Evin həyətinə əldə düzəltmə partlayıcı atan şəxs saxlanılıb

Ordu vilayətinin Ünye ilçəsində bir evin həyətinə əldə düzəltmə partlayıcı maddə atan şəxs polis tərəfindən qısa zamanda yaxalanıb.

Sonxeber.az türk mediasına istinadən xəbər verir ki, hadisə Göbü məhəlləsinin Aşağı Alan küçəsində baş verib.

Məlumata görə, bir müddət ərazidə dolaşan K.Ç. adlı şəxs əlindəki əldə düzəltmə partlayıcı maddəni qəfil atıb. Partlayıcı, küçə üzərində yerləşən bir evin həyətinə düşüb. Evdə olan sakinlər dərhal 112-yə məlumat veriblər.

Əraziyə qısa müddətdə təcili yardım və çox sayda polis əməkdaşı cəlb edilib. Partlayıcı maddəni atdıqdan sonra hadisə yerindən qaçan şəxs Ünye Rayon Polis İdarəsinin əməkdaşları tərəfindən tez bir zamanda yaxalanıb.

Hadisədən sonra Ordu İl Polis Müdiri Ahmet Acar bölgəyə gələrək araşdırma aparıb və Ünye Rayon Polis Müdiri Celal Sarısoydan məlumat alıb.

Şübhəlinin polis bölməsindəki istintaq tədbirlərinin davam etdiyi bildirilib.

Telegramda izləyin