Saxta içki yenə can alır: Mütəxəssislərdən həyati xəbərdarlıq - VİDEO

Saxta içki, xüsusilə Yeni il ərəfəsində insan tələfatına səbəb olmağa davam edir. Metil spirtindən (metanol) zəhərlənmə hallarında hər üç hadisədən biri ölüm və ya daimi əlilliklə nəticələnir. Mütəxəssislər başgicəllənmə, ürəkbulanma və görmə pozğunluğu kimi ən kiçik əlamətlər zamanı belə dərhal xəstəxanaya müraciət etməyin həyati əhəmiyyət daşıdığını vurğulayırlar.

Sonxeber.az türk mediasına istinadən xəbər verir ki, hər il onlarla insan saxta içki səbəbindən həyatını itirir. Xüsusilə Yeni il yaxınlaşdıqca xəstəxanalara müraciətlərin sayı artır. Ən kiçik şübhə zamanı belə vaxt itirilməsi ölüm riskini daha da artırır.

Yeni ilə sayılı günlər qalmış saxta içki mövzusu yenidən gündəmə gəlib. Saxta içki istehlakı, başqa sözlə metil spirtindən zəhərlənmə, geri dönüşü olmayan ağır nəticələrə səbəb olur. Statistikaya görə, bu cür zəhərlənən hər üç xəstədən biri ya həyatını itirir, ya da ömürlük əlilliklə yaşamaq məcburiyyətində qalır.

Baş dönməsi, ürəkbulanma, gözlərdə qaralma kimi əlamətlərdən yalnız biri belə müşahidə olunarsa, dərhal tibbi yardıma müraciət edilməlidir. Saxta içkini qoxusuna, rənginə və ya dadına görə ayırd etmək mümkün olmadığından, içkinin alındığı yer xüsusi əhəmiyyət daşıyır. Alkoqol satışı üçün rəsmi lisenziyası olan obyektlərdən alış-veriş edilməlidir.

Mütəxəssislər saxta içki ilə bağlı xəbərdarlıqlarını davam etdirirlər. Qida mühəndisi Süleyman Uzun bildirib ki, adi istehlakçının saxta alkoqolu müəyyən etməsi mümkün deyil. Onun sözlərinə görə, "Qoxu və dad vasitəsilə bunu anlamaq mümkün deyil. Saxta olub-olmadığını yalnız laboratoriya şəraitində müəyyən edə bilirik".

Türkiyə Təcili Tibb Dərnəyinin Toksikologiya Qrupunun sədri professor Ayça Açıkalın Akpınar isə xəstənin adi alkoqol yoxsa metanol zəhərlənməsi keçirdiyini anlamaq üçün müəyyən vaxtın keçməsinin lazım olduğunu qeyd edib. O, xəstəxanaya gec müraciət edildiyi hallarda ölüm riskinin olduqca yüksək olduğunu vurğulayıb.

Dərnəyin Toksikologiya Qrupunun üzvü Dr. Ömer Taşkın da bəzi hallarda bütün tibbi müdaxilələrə baxmayaraq xəstələrin həyatını xilas etməyin mümkün olmadığını bildirib. Taşkının sözlərinə görə, "Hallardan təxminən üçdə birində insanlar daimi sağlamlıq zədəsi ilə həyatlarını davam etdirmək məcburiyyətində qalırlar".

Mütəxəssislər vətəndaşları diqqətli olmağa, şübhəli hallarda isə vaxt itirmədən tibbi yardıma müraciət etməyə çağırırlar.

Telegramda izləyin