"Azərbaycanın əfv və amnistiya təcrübəsi zəngin tarixi ənənəyə malikdir" - DEPUTAT

"Azərbaycan Respublikasının müasir siyasi inkişaf mərhələsi hüquqi dövlət quruculuğu və tam suverenliyin bərpası ilə səciyyələnir. 2025-ci ilin "Konstitusiya və Suverenlik İli" elan olunması bu mərhələnin ideoloji və hüquqi mahiyyətini dolğun şəkildə ifadə edir. Bu kontekstdə Prezident İlham Əliyevin amnistiya elan edilməsi təşəbbüsü dövlət siyasətinin humanist və sosialyönümlü xarakterini ön plana çıxarır. Ulu Öndər Heydər Əliyevin müəyyən etdiyi dövlətçilik strategiyasının əsas sütunlarından biri hüququn aliliyidir. 1995-ci ildə qəbul edilən Azərbaycan Respublikasının Konstitusiyası insan hüquq və azadlıqlarını ali dəyər kimi təsbit edərək demokratik idarəçilik modelinin əsasını qoymuşdur. Bu siyasi irs Prezident İlham Əliyev tərəfindən müasir reallıqlara uyğun şəkildə davam etdirilir".

Bunu Sonxeber.az-a Milli Məclisin deputatı Şahin Seyidzadə danışıb.

O, açıqlamasında qeyd edib ki, Prezident İlham Əliyevin həyata keçirdiyi dövlət siyasətində humanizm yalnız nəzəri anlayış deyil, konkret mexanizmlərlə təmin olunan praktik fəaliyyətdir:

"Sosial müdafiə tədbirləri, əhalinin həssas qruplarına qayğı, şəhid ailələrinə və qazilərə göstərilən diqqət bu siyasətin əsas istiqamətlərindəndir. Cinayət-hüquq sistemində də humanist yanaşma prioritet hesab olunur.

Bu baxımdan 15 dekabr 2025-ci ildə amnistiya təşəbbüsünün irəli sürülməsi xüsusi siyasi və mənəvi məna daşıyır. Suverenliyimizin tam təmin edildiyi, dövlət hakimiyyətinin bütün ərazilərdə bərqərar olduğu bir dövrdə bu qərar cəmiyyətə barış, yenilənmə və sosial həmrəylik mesajı verir. Prezident İlham Əliyev cəzanın tərbiyəedici mahiyyətinə inanaraq səhv etmiş şəxslərə yenidən cəmiyyətə inteqrasiya imkanı yaradır.

Amnistiya aktının şamil olunduğu kateqoriyalar dövlətin milli yaddaşına və sosial ədalət prinsipinə əsaslanır. Azərbaycanın ərazi bütövlüyü uğrunda döyüşlərdə iştirak etmiş şəxslərin, şəhid və itkin düşmüş hərbçilərin yaxınlarının amnistiya siyahısına daxil edilməsi milli həmrəyliyin hüquqi ifadəsidir. Bu addım dövlətin öz müdafiəçilərinə olan mənəvi borcunun təzahürüdür.

Eyni zamanda, mülki əhaliyə qarşı törədilmiş hərbi cinayətlər nəticəsində əlil olmuş şəxslərin, qadınların, yaşlıların və yetkinlik yaşına çatmayanların amnistiyadan faydalanması sosial ədalət və mərhəmət prinsiplərinin üstün tutulduğunu göstərir. Az ağır və ehtiyatsızlıqdan törədilmiş cinayətlərə görə məhkum olunmuş şəxslərin cəzadan azad edilməsi isə hüquqi siyasətin humanist istiqamətini daha da gücləndirir".

Deputat onu da vurğuladı ki, bu amnistiya aktı tətbiq dairəsinə görə müstəqil Azərbaycanın tarixində ən genişmiqyaslı akt kimi qiymətləndirilir:

"On minlərlə insanın hüquqi statusuna müsbət təsir göstərəcək bu qərar penitensiar sistemin humanistləşdirilməsi istiqamətində mühüm addımdır. Minlərlə ailə üçün bu təşəbbüs yeni həyat mərhələsinin başlanğıcı olacaq.

Azərbaycanın əfv və amnistiya təcrübəsi zəngin tarixi ənənəyə malikdir. 1995-ci ildən etibarən qəbul edilən amnistiya aktları on minlərlə şəxsin cəmiyyətə qayıdışına imkan yaradıb. Xüsusilə Prezident İlham Əliyevin dövründə imzalanmış əfv sərəncamları və təşəbbüs edilmiş amnistiyalar dövlətin humanist imicini beynəlxalq müstəvidə də möhkəmləndirib.

Bu prosesdə Mehriban xanım Əliyevanın təşəbbüsləri də xüsusi qeyd olunmalıdır. Onun deputatlıq fəaliyyəti dövründə irəli sürdüyü amnistiya aktları sosial ədalət, ailə dəyərləri və humanizm prinsiplərinin qanunvericilikdə əks olunmasına mühüm töhfə verib.

Nəticə etibarilə, Prezident İlham Əliyevin "Konstitusiya və Suverenlik İli" münasibətilə irəli sürdüyü amnistiya təşəbbüsü güclü dövlətin yalnız sərt hüquqi mexanizmlərlə deyil, eyni zamanda mərhəmət və ədalətlə idarə olunduğunu sübut edir. Bu qərar Azərbaycan dövlətçiliyinin yetkinliyini, hüquqi və mənəvi üstünlüklərini bir daha nümayiş etdirir".

Vüsalə İbrahimli

Telegramda izləyin