"Behin məbləğindən asılı olmayaraq, beh haqqında razılaşma yazılı formada bağlanmalıdır" - AÇIQLAMA

"Beh öhdəliklərin icrasının təmin edilməsi üsullarından biridir. Beh anlayışı Mülki Məcəllənin 491-ci maddəsi ilə tənzimlənir. Bu normaya əsasən, beh müqavilənin bağlanmasını təsdiq etmək və icrasını təmin etmək məqsədilə razılığa gələn tərəflərdən birinin müqavilə üzrə digər tərəfə verəcəyi ödənişlər hesabına verdiyi pul məbləğidir".

Bunu Sonxeber.az-a Vəkillər Kollegiyasının üzvü Rəşad Əliyev danışıb.

O, açıqlamasında qeyd edib ki, behin məbləğindən asılı olmayaraq, beh haqqında razılaşma yazılı formada bağlanmalıdır:

"Beh haqqında razılaşma daşınmaz əmlaka sərəncam verilməsi barədə müqavilənin bağlanması ilə bağlı olduqda, notariat qaydasında təsdiq edilməlidir. Müqavilə üzrə tərəfin verəcəyi ödənişlər hesabına ödənilmiş məbləğin beh olub-olmaması ilə bağlı şübhə yarandıqda, həmin məbləğ, əgər əksi sübuta yetirilməzsə, avans kimi ödənilmiş sayılır.

Behlə təmin edilmiş öhdəliyə xitam verilməsinin və onun icra edilməməsinin nəticələri isə Mülki Məcəllənin 492-ci maddəsində təsbit edilib. Belə ki, öhdəliyin icrasına başlanana qədər ona tərəflərin razılaşması üzrə və ya icranın mümkün olmaması nəticəsində xitam verildikdə, beh qaytarılmalıdır.

Əgər müqavilənin icra edilməməsinə görə beh vermiş tərəf məsuliyyət daşıyırsa, beh digər tərəfdə qalır. Əgər müqavilənin icra edilməməsinə görə beh almış tərəf məsuliyyət daşıyırsa, o, digər tərəfə behin iki mislini ödəməlidir. Bundan əlavə, müqavilənin icra edilməməsinə görə məsuliyyət daşıyan tərəf, əgər müqavilədə ayrı qayda nəzərdə tutulmayıbsa, beh məbləği nəzərə alınmaqla, dəymiş zərərin əvəzini digər tərəfə ödəməyə borcludur".

Vüsalə İbrahimli

Telegramda izləyin