"Gürcüstanın tranzit prosesində yer alması da Azərbaycanın qurduğu yeni regional modelin bir hissəsidir" - AÇIQLAMA

Azərbaycandan neft məhsulları daşıyan ilk yük qatarının Gürcüstan ərazisindən keçməklə Ermənistana yola salınması regionda sülh və əməkdaşlıq prosesinin real nəticəsidir.

Bunu Gürcüstan Prezident Administrasiyasının sabiq rəhbəri, siyasi şərhçi professor Petre Mamradze deyib.

Onun sözlərinə görə, bu hadisə Azərbaycan hökumətinin və şəxsən Prezident İlham Əliyevin xoş niyyətinin növbəti təzahürüdür:

"Təəssüf ki, uzun illər ərzində Azərbaycan-Ermənistan münasibətləri arzuolunan səviyyədə olmayıb. Lakin bu gün, bütün çətinliklərə baxmayaraq, münasibətləri məhz bu məcraya yönəltmək mümkün olub və proses mərhələli şəkildə inkişaf edir. Bunun arxasında konkret siyasi iradə və məqsədyönlü addımlar dayanır. Biz bunu yalnız alqışlaya bilərik".

"Bu prosesin mərkəzində birmənalı şəkildə Azərbaycan dayanır və bunu gizlətməyə də ehtiyac yoxdur", - bunu Sonxeber.az -a açıqlama verən politoloq Tural İsmayılov deyib:

"İlk yük qatarının hərəkətə başlaması regionda sülhün təşəbbüskarı, mühərriki və real icraçısının kim olduğunu açıq şəkildə göstərdi. Azərbaycan yenə də hadisələrin arxasınca qaçan yox, oyunun qaydalarını müəyyən edən tərəf kimi çıxış edir.

Məsələnin mahiyyəti ondadır ki, Bakı sülhü sentimental çağırışlar üzərindən deyil, real iqtisadi rıçaqlar vasitəsilə inşa edir. Neft məhsullarının Ermənistana göndərilməsi Azərbaycanın gücündən və özünəinamından doğan addımdır. Zəif tərəf güzəştə getmir, güclü tərəf risk edir. Bu risk isə hesablanmış, strateji və uzunmüddətli regional sabitliyə xidmət edən qərardır. Prezident İlham Əliyevin siyasi xətti də məhz burada oxunur: qalib dövlət sülhü diktə etmir, onu qurur.

Azərbaycan bu addımla həm də göstərir ki, regionda iqtisadi inteqrasiyanın açarı Bakının əlindədir. Kommunikasiyalar, enerji axınları, logistika xətləri Azərbaycanın iştirakı olmadan işlək ola bilməz. Ermənistan reallığı nə qədər gec qəbul etsə də, fakt dəyişmir: regional normalizasiya Azərbaycanın razılığı və təşəbbüsü olmadan mümkün deyil.

Gürcüstanın tranzit prosesində yer alması da Azərbaycanın qurduğu yeni regional modelin bir hissəsidir. Bakı Cənubi Qafqazda qarşıdurma yox, əməkdaşlıq arxitekturası formalaşdırır və bu model artıq işləməyə başlayıb.

Bir sözlə, bu qatar sadəcə yük daşımır. O, Azərbaycanın regional liderliyini, siyasi məsuliyyətini və sülh gündəliyini daşıyır. Və bu, kağız üzərində yox, relslər üzərində gedən siyasətdir".

Telegramda izləyin