Sərbəst buraxılan Melisa Döngəldən ilk açıqlama: "Xəbərlər həqiqəti əks etdirmir"

İstanbul Respublika Baş Prokurorluğunun 18 dekabr tarixində başladığı narkotik istintaqı çərçivəsində adı keçən məşhur aktrisa Melisa Döngəl, həmin vaxt xaricdə olduğu üçün ünvanında tapılmamışdı. Aktrisa qısa müddət əvvəl Türkiyəyə qayıdaraq Ədli Tibb Qurumunda saç və qan nümunələri verdikdən sonra sərbəst buraxılıb.

Sonxeber.az türk mediasına itinadən xəbər verir ki, Melisa Döngəl baş verənlərlə bağlı sosial media hesabında açıqlama yayımlayıb. Son günlər barəsində yayılan xəbərlərə münasibət bildirməyə ehtiyac duyduğunu deyən aktrisa bildirib:

"Media orqanlarında hələ də xaricdə olduğum və mənlə əlaqə saxlanıla bilmədiyi ilə bağlı yayılan xəbərlər həqiqəti əks etdirmir. Hadisədən xəbər tutan kimi, hər hansı anlaşılmazlığa yol verməmək üçün həmin gün saat 14:00-da Türkiyəyə uçdum və 18:15-də İstanbula endim. Aidiyyəti qurumlara şəxsən müraciət edərək ifadə verdim. Proses hüquqa uyğun şəkildə tamamlandı və ifadəmdən sonra sərbəst buraxıldım. Vəzifələrini son dərəcə nəzakətli, peşəkar və həssaslıqla yerinə yetirən bütün səlahiyyətli şəxslərə və mənə anlayış göstərən sevənlərimə təşəkkür edirəm".

Qeyd edək ki, İstanbul Respublika Baş Prokurorluğunun apardığı narkotik istintaqı çərçivəsində 18 dekabrda İstanbul İl Jandarma Komandanlığının əməkdaşları tərəfindən bir sıra məşhur şəxslərin evlərinə səhər saatlarında əməliyyat keçirilib. İstintaq çərçivəsində Aleyna Tilki, İrem Sak, Danla Bilic və Mümmine Senna Yıldız saxlanılıb, Ədli Tibb Qurumunda onlardan qan və saç nümunələri alındıqdan sonra sərbəst buraxılıblar.

Barəsində saxlanılma qərarı olan Melisa Döngəl və müğənni Yusuf Güney isə həmin vaxt ünvanlarında tapılmamışdı. Məlumata görə, Yusuf Güney bu gün saxlanılıb.

Telegramda izləyin