Bank qarşısında silahlı quldurluq cəhdinin təfərrüatları üzə çıxıb

İstanbulun Başakşehir rayonunda bir bank filialının qarşısında baş verən silahlı quldurluq cəhdinin maraqlı detalları məlum olub.

Sonxeber.az türk mediasına istinadən xəbər verir ki, hadisə İkitelli Organize Sənaye Bölgəsində yerləşən bank filialının çıxışında qeydə alınıb. İlkin məlumata görə, A.Ö. (44), T.T. (41) və F.P. (19) adlı şəxslər bankdan pul çıxardıqları zaman naməlum şəxslərin onları silah gücü ilə qarət etdiyini iddia edərək polisə müraciət ediblər. Dərhal hadisə yerinə çoxsaylı polis əməkdaşları cəlb olunub.

İstanbul Polis İdarəsinin əməkdaşları tərəfindən aparılan ətraflı araşdırma zamanı hadisənin üçüncü şəxslərlə əlaqəsinin olmadığı müəyyən edilib. Məlum olub ki, A.Ö. və T.T., F.P.-nin çalışdığı şirkətin sahibinə borclu olduqları üçün banka gedərək pul çıxarıb və həmin məbləği F.P.-yə təhvil veriblər.

Araşdırmalar zamanı daha sonra T.T.-nin pulu alan F.P.-yə hücum edərək onu döydüyü, bu vaxt isə A.Ö.-nün silahla havaya təsadüfi atəş açaraq bankın qarşısında olan F.P.-nin dostlarını dağıtdığı müəyyən edilib. Hadisə zamanı xəsarət alan olmayıb, lakin havaya açılan atəşlərdən biri park halında olan avtomobilə dəyib.

Polis hadisə yerində apardığı araşdırmadan sonra A.Ö.-nü istifadə etdiyi silahla birlikdə, eləcə də T.T. və F.P.-ni qısa zamanda saxlayaraq gözaltına alıb. F.P. polisə verdiyi ifadədə, hadisə zamanı sanki üçüncü şəxslər tərəfindən silah gücü ilə hücuma məruz qalmış kimi ifadə verdiyini etiraf edib.

İstintaqdan sonra F.P. prokurorluğun göstərişi ilə sərbəst buraxılıb, A.Ö. və T.T. isə sabah məhkəməyə çıxarılacaq.

Telegramda izləyin