"Levon Mnatsakanyanın son sözündə səsləndirdiyi əks fikirlər mahiyyət etibarilə müdafiə refleksidir" - AÇIQLAMA

Bakı Hərbi Məhkəməsində Ermənistan Respublikası vətəndaşlarının ittiham olunduğu cinayət işi üzrə məhkəmə prosesi təqsirləndirilən şəxslərin son söz çıxışları ilə davam etdirilir.

Dekabrın 23-də keçirilən məhkəmə iclasında təqsirləndirilən şəxs Levon Mnatsakanyan son söz çıxışını davam etdirib.

O, 2016-cı ilin Aprel döyüşləri, muzdlular və s. barədə ittiham tərəfinin və zərərçəkmiş şəxslərin bildirdikləri ilə bağlı özünün əks fikirlərini səsləndirib.

"Bakı Hərbi Məhkəməsində davam edən bu proses sıradan bir məhkəmə işi deyil, bu, tarixin hüquqi müstəvidə danışdığı andır. Ermənistan vətəndaşlarının sülh və insanlıq əleyhinə, müharibə və terror cinayətlərinə görə mühakimə olunması Azərbaycan dövlətinin "unutduq" yox, "hesab soruşduq" deməsidir" , - bunları Sonxeber.az -a açıqlama verən politoloq Tural İsmayılov deyib:

"Uzun illər beynəlxalq tribunaların susduğu, ikili standartların hökm sürdüyü bir mərhələdən sonra Bakı artıq ədaləti öz hüquqi mexanizmləri ilə təmin edir.

Levon Mnatsakanyanın son sözündə səsləndirdiyi əks fikirlər mahiyyət etibarilə müdafiə refleksidir. Amma faktlar inadkardır. Aprel döyüşləri, muzdluların iştirakı, mülki əhaliyə qarşı törədilən cinayətlər təkcə Azərbaycan cəmiyyətinin yaddaşında yox, sənədlərdə, sübutlarda, şahid ifadələrində mövcuddur. Burada emosiyalar yox, hüquq danışır. Və hüquq da aydındır.

Bu məhkəmə prosesi Azərbaycanın postmünaqişə dövründə seçdiyi yolun göstəricisidir: qisas yox, ədalət; xaos yox, hüquqi nizam. Dövlət öz gücünü revanşizm üzərindən deyil, hüquqi suverenlik üzərindən nümayiş etdirir. Bu, həm daxili auditoriya, həm də beynəlxalq ictimaiyyət üçün ciddi mesajdır: Azərbaycan müharibəni meydanda bitirdi, indi isə hüquqi müstəvidə yekunlaşdırır.

Tarixdə çox müharibələr olub, amma hər qalib ədaləti təmin edə bilməyib. Azərbaycanın fərqi də elə bundadır. Bu proses təkcə keçmişin cavabı deyil, gələcək üçün standartdır. Və bu standartın adı hüquqa söykənən güclü dövlətdir".

Qeyd edək ki, Ermənistanın hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan Respublikasının vətəndaşlarının məhkəməsi davam etdirilir.

Telegramda izləyin