Keçmiş həyat yoldaşını 55 bıçaq zərbəsi ilə öldürən şəxsə ağırlaşdırılmış ömürlük həbs istənildi

Türkiyənin Konya şəhərində boşandığı həyat yoldaşı Bahriye Kalaycıyı 55 bıçaq zərbəsi ilə qətlə yetirən Fatih Uluşan barəsində davam edən məhkəmə prosesində prokuror əsas ittiham üzrə rəyini açıqlayıb.

Sonxeber.az türk mediasına istinadən xəbər verir ki, prokurorluq təqsirləndirilən şəxs üçün haqsız təhrik və yaxşı hal güzəştləri tətbiq edilmədən ağırlaşdırılmış ömürlük həbs cəzası tələb edib.

Hadisə 2 noyabr 2024-cü il tarixində, saat 12:00 radələrində Karatay rayonunun İsmil məhəlləsi, Emirler ərazisində baş verib. Məlumata görə, 2023-cü ildə boşandığı və bir uşaq anası olan 25 yaşlı Bahriye Kalaycının yaşadığı ünvana gedən 27 yaşlı Fatih Uluşan, keçmiş həyat yoldaşını söhbət bəhanəsi ilə avtomobilinə mindirib və boş əraziyə aparıb. Burada yaranan mübahisə zamanı Kalaycını 55 dəfə bıçaqlayıb. Daha sonra eyni bıçaqla özünü də boynundan yaralayıb.

Uluşanın bir qohumuna zəng edərək xəbər verməsindən sonra hadisə yerinə təcili tibbi yardım və jandarma əməkdaşları cəlb olunub. Həkimlər Bahriye Kalaycının hadisə yerində həyatını itirdiyini müəyyən ediblər. Ağır yaralanan Fatih Uluşan isə Konya Şəhər Xəstəxanasına çatdırılıb. Müalicədən sonra o, məhkəmə qərarı ilə həbs edilərək cəzaçəkmə müəssisəsinə göndərilib.

Konya Respublika Baş Prokurorluğu tərəfindən aparılan istintaq yekunlaşdırılaraq iş Konya 2-ci Ağır Cinayətlər Məhkəməsinə göndərilib. İttiham aktında şübhəlinin cinayət alətlərini əvvəlcədən hazırladığı, əməli soyuqqanlılıqla törətdiyi və mərhumun bədənində 11-i öldürücü olmaqla ümumilikdə 55 bıçaq yarası olduğu qeyd olunub.

Bu gün keçirilən məhkəmə iclasında Bahriye Kalaycının valideynləri Elife və Ahmet Kalaycı, təqsirləndirilən Fatih Uluşan və tərəflərin vəkilləri iştirak ediblər. Ata Ahmet Kalaycı çıxışında, "Bu adam qızımı öldürəcəyini bilirdi. Kameranı tək bucağa sabitləyib, yanına iki bıçaq alıb. Bıçaqladıqdan sonra başında oturub siqaret çəkərək ölməsini gözləyib. 55 yerdən bıçaqlamağın harası sədaqətdir?" deyə bildirib.

Müdafiə çıxışında Fatih Uluşan peşman olduğunu söyləyib.

Respublika prokuroru sanığın "qəsdən və planlı şəkildə keçmiş həyat yoldaşını, qadını öldürmə" cinayətini törətdiyinin sübuta yetirildiyini vurğulayaraq, heç bir endirim tətbiq olunmadan ağırlaşdırılmış ömürlük həbs cəzası istəyib. Məhkəmə heyəti tərəf vəkillərinin müdafiə üçün hazırlıq görməsi məqsədilə iclası təxirə salıb.

Telegramda izləyin