Almaniya 100 gün tam izolyasiyada yaşayacaq könüllülər axtarır - 23 min avro ödəniləcək

Almaniya kosmik missiyalara hazırlıq çərçivəsində qeyri-adi bir elmi layihəyə start verib.

Sonxeber.az xarici mediaya istinadən xəbər verir ki, Ay və Mars missiyalarında astronavtların qarşılaşacağı çətin şəraitləri Yer üzündə sınaqdan keçirmək məqsədilə 100 gün ərzində tam izolyasiyada yaşamağı qəbul edəcək könüllülər axtarılır. Təcrübədə iştirak edən şəxslərə 23 min avro ödəniş ediləcək.

Elmi eksperiment Köln şəhərində həyata keçiriləcək. Layihənin əsas məqsədi insanın uzunmüddətli təcrid şəraitinə fiziki və psixoloji davamlılığını ölçməkdir. Təcrübə zamanı iştirakçılar kosmik stansiya simulyasiyasında, xarici dünya ilə tam əlaqəsi kəsilmiş şəkildə yaşayacaqlar.

Könüllülər 100 gün ərzində 24 saat nəzarət altında saxlanılacaq. İzolyasiyanın insan orqanizminə və psixoloji vəziyyətə təsirləri mütəxəssis qruplar tərəfindən davamlı şəkildə izləniləcək və qeydə alınacaq.

Təcrübədə iştirak etmək istəyən namizədlərin sağlamlıq vəziyyətinin yaxşı olması, ingilis dilini bilməsi və minimum bakalavr dərəcəsinə sahib olması tələb olunur. Bundan əlavə, texniki, tibb və ya oxşar elmi sahələr üzrə təhsil almış şəxslərə üstünlük veriləcək.

Layihə Almaniyanın gələcək kosmik missiyalar üçün insan faktorunu daha dərindən araşdırmaq istiqamətində atdığı mühüm addımlardan biri kimi qiymətləndirilir.

Telegramda izləyin