Niyə dostlarımızı itiririk? Ən çox rast gəlinən 6 səhv

Dostluq münasibətləri həyatımızda böyük rol oynayır, lakin biz tez-tez onlara avtomatik yanaşır, lazımi diqqəti göstərmirik. Hər bir əhəmiyyətli bağ kimi, dostluq da dürüstlük, dialoq və səhvlər üzərində işləməyə hazır olmağı tələb edir. Bəzən anlaşılmazlıqlar və ya ehtiyatsız davranışlar münasibətlərin soyumasına səbəb olur, amma bir çox hallarda vəziyyəti düzəltmək mümkündür.

Lent.az xarici mediaya istinadən xəbər verir ki, psixoloqlar dostları necə və niyə itirdiyimizi, münasibətlərin bəzən görünən səbəb olmadan niyə bitdiyini izah ediblər.

Mütəxəssislər vurğulayırlar ki, təsadüfi sərtlik və ya diqqətsizlik insanı pis biri etmir. Hamımız səhv edirik. Əsas məsələ məsuliyyəti dərk etmək və dəyişməyə hazır olmaqdır. Əksər hallarda, hər iki tərəf dialoqa açıqdırsa, dostluğu bərpa etmək mümkündür.

Dostluqda ən çox rast gəlinən səhvlər və onların həlli yolları

Empatiya əvəzinə istənilməyən məsləhətlər vermək

Dostumuz çətinliklərini paylaşanda, çox vaxt dərhal həll yolları təklif edirik, halbuki həmin anda ona dəstək və anlayış lazımdır. Vəziyyəti "düzəltmək" istəyi onun hissələrini dəyərsizləşdirmək kimi görünə bilər. Bunun qarşısını almaq üçün əvvəlcə empatiya göstərmək, sonra isə məsləhətə ehtiyac olub-olmadığını soruşmaq vacibdir.

Dostu birgə planlardan kənarda qoymaq

Bəzən dostu görüşlərə dəvət etməyi dayandırırıq, onun yerinə qərar veririk ki, maraqlı olmayacaq, vaxtı olmayacaq və ya çətin olacaq. Bu cür fərziyyələr çox inciticidir. Ən doğru yol hər zaman dəvət etmək və qərarı insanın özünə buraxmaqdır.

Başqasının vaxtına sahib çıxmaq hissi

Bəzi insanlar dostunun yalnız özünə uyğun vaxtda əlçatan olmalı olduğunu düşünür, onun şəraitini nəzərə almırlar. Bu, xüsusilə həyat ritmləri dəyişəndə ortaya çıxır. Problemi həll etməyin yolu açıq söhbət və şəxsi sərhədlərə hörmətdir.

Əhəmiyyətli hadisələri görməməzlikdən gəlmək

Dostun həyatındakı vacib anlarda - istər sevinc, istərsə də itki zamanı - susmaq çox vaxt laqeydlik kimi qəbul edilir. Səbəb nəsə səhv demək qorxusu ola bilər, amma sadə bir dəstək mesajı belə böyük fərq yarada bilər.

Görüşlərin tez-tez ləğv edilməsi

Ara-sıra görüşü ləğv etmək normaldır, amma bu vərdişə çevriləndə etibar sarsılır. Təkcə üzr istəmək deyil, yeni tarix təklif etmək də vacibdir ki, dostluğun dəyərli olduğu hiss olunsun.

Dostun vəziyyətinə diqqətsizlik

Dostun qərarlarına onun vəziyyətini anlamağa çalışmadan incimək tez-tez münaqişələrə səbəb olur. Həll yolu sadədir - sual vermək, dinləmək və yaxın insanın yaşadığı şəraiti nəzərə almaq.

Telegramda izləyin