"2025-ci il Azərbaycanın gücünü, diplomatik çevikliyini və strateji uzaqgörənliyini nümayiş etdirən dönüş nöqtəsi oldu" - AÇIQLAMA

"Prezident İlham Əliyevin ənənəvi illik müsahibəsində səsləndirdiyi fikirlər Azərbaycanın 2025-ci ildə əldə etdiyi tarixi nailiyyətlərin ümumi mənzərəsini ortaya qoyur" , - bunu Sonxeber.az -a açıqlama verən politoloq Tural İsmayılov deyib:

"Dövlət başçısının 2025-ci ili dönüş ili kimi qiymətləndirməsi təsadüfi deyil. Çünki bu dövr həm münaqişənin siyasi müstəvidə yekunlaşması, həm də Azərbaycanın beynəlxalq aləmdə mövqelərinin güclənməsi ilə yadda qaldı. Ermənistan-Azərbaycan müharibəsinə siyasi son qoyulması regionda yeni reallıqların formalaşmasına səbəb oldu. Azərbaycan artıq sülh şəraitində inkişaf yoluna qədəm qoydu və bu, ölkənin gələcək strateji prioritetlərinin həyata keçirilməsi üçün geniş imkanlar açdı.

Vaşinqton səfəri zamanı ABŞ Prezidenti Donald Trampın dəvəti ilə aparılan danışıqlar nəticəsində 907-ci düzəlişin aradan qaldırılması, strateji işçi qrupunun yaradılması və Zəngəzur dəhlizinin beynəlxalq səviyyədə təsdiqlənməsi Azərbaycanın diplomatik uğurlarının bariz nümunəsidir. Bu addımlar ölkəmizin regional və qlobal miqyasda strateji əhəmiyyətini bir daha təsdiqlədi.

Xarici siyasət sahəsində əldə edilən uğurlar da diqqətəlayiqdir. Çinlə hərtərəfli strateji tərəfdaşlıq, D-8 təşkilatına üzvlük, Mərkəzi Asiya Məşvərət Şurasına tamhüquqlu qəbul və Türk Dövlətləri Təşkilatı çərçivəsində əməkdaşlıq Azərbaycanın beynəlxalq nüfuzunu artırdı. Xüsusilə Çinlə münasibətlərin strateji əhəmiyyəti vurğulanaraq, son iki ildə imzalanan sənədlərin real iqtisadi nəticələr verdiyi qeyd olundu. Bu, Azərbaycanın Asiya ilə inteqrasiyasını gücləndirir və iqtisadi sabitliyini möhkəmləndirir.

Prezidentin Qarabağ və Şərqi Zəngəzurun bərpasını milli prioritet kimi önə çəkməsi Böyük Qayıdış proqramının ardıcıl icrası ilə bağlıdır. Bu, həm sosial, həm də iqtisadi baxımdan ölkənin gələcəyinə yönəlmiş strateji addımdır. İlham Əliyevin açıqlamaları göstərir ki, Azərbaycan yalnız regional sabitlik və sülhün təminatçısı deyil, həm də qlobal miqyasda etibarlı tərəfdaş və lider dövlət kimi mövqeyini möhkəmləndirir. 2025-ci il bu baxımdan Azərbaycanın gücünü, diplomatik çevikliyini və strateji uzaqgörənliyini nümayiş etdirən dönüş nöqtəsi oldu".

Telegramda izləyin