"Sülh Şurasına üzv seçilməsi Azərbaycanın beynəlxalq arenada artan rolunun təsdiqidir" - AÇIQLAMA

"Yanvarın 22-də Davosda keçirilən Prezident İlham Əliyev və Donald Trampın görüşü Azərbaycan-ABŞ münasibətlərində tarixi əhəmiyyətə malik olan bir tədbir olaraq dəyərləndirilməlidir. Görüş Donald Trampın təşəbbüsü ilə yaradılan "Sülh Şurasının" Nizamnaməsinin təntənəli imzalanması ilə əlaqədar baş tutdu və Azərbaycan bu təşkilatın üzvlərindən biri kimi çıxış etdi. Bu, Trampın hakimiyyətə qayıtmasından sonra ikitərəfli əlaqələrin müxtəlif sahələrdə inkişafı ilə məmnunluq ifadə edilən bir görüş oldu".

Bu sözləri Sonxeber.az-a politoloq Tural İsmayılov danışıb.

O, açıqlamasında qeyd edib ki, görüşdə xüsusilə vurğulanan mühüm məqamlardan biri Donald Trampın Azərbaycan-Ermənistan arasında sülh gündəminin irəli aparılması ilə bağlı Vaşinqtonda 8 avqust razılaşmalarına nail olunmasında oynadığı tarixi rol oldu:

"Bu, Azərbaycanın regional sülh prosesində əldə etdiyi nailiyyətlərin ABŞ tərəfindən tanınması deməkdir. Prezident İlham Əliyev regionda artıq sülhün bərqərar olduğunu bildirərək, bunun iki ölkə arasında ticarət əlaqələrinin inkişafında da öz əksini tapdığını qeyd etdi.

Xüsusilə neft məhsullarının Azərbaycandan Ermənistana ixracı və idxal edilmiş taxılın Azərbaycan ərazisindən Ermənistana çatdırılması bu proseslərin konkret nümunələri kimi göstərildi. Bu, Azərbaycanın sülh prosesində konstruktiv yanaşmasını və regional əməkdaşlığa açıq olduğunu əks etdirir. Azərbaycanın müstəqil xarici siyasət yürütməsi görüşdə diqqət mərkəzində olan mövzulardan biridir.

Ölkənin inteqrasiya layihələrində seçici yanaşması, biznes baxımından isə vergi, gömrük rüsumları, bazar çıxışı və əlaqəli tənzimləmələr məsələlərində əhəmiyyətli dərəcədə çeviklik nümayiş etdirməsi ABŞ-ın Azərbaycanda investisiya imkanlarını qiymətləndirərkən nəzərə aldığı strateji üstünlükdür. Görüşdən sonra ABŞ biznes nümayəndə heyətinin Azərbaycana səfərinin elan edilməsi ikitərəfli iqtisadi əməkdaşlığın genişlənəcəyinə işarədir.

Diqqət çəkicidir ki, bu dəfə diqqət qeyri-neft sektoruna yönəlir, lakin energetika sektorunda əldə edilmiş təcrübə yeni sahələrdə də tətbiq olunur. Azərbaycan güclü və nüfuzlu lider tərəfindən idarə olunan konsolidasiya olunmuş dövlət kimi təqdim edilir. Ölkənin öhdəliklərini ardıcıl şəkildə yerinə yetirməsi və tərəfdaşları ilə ikili standartlara yol verməməsi ABŞ-ın gözündə etibarlı tərəfdaş kimi dəyərini artırır".

Politoloq onu da vurğuladı ki, Azərbaycanın rəsmi mövqelərini dəyişdirməməsi və siyasi qruplar arasında tərəddüd etməməsi xarici siyasətdə praqmatizm və ardıcıllığın göstəricisidir:

"Sülh Şurasına üzv seçilməsi Azərbaycanın beynəlxalq arenada artan rolunu və regional məsələlərin həllində fəal iştirakını təsdiqləyir. 59 ölkənin iştirak etdiyi bu təşkilatda Azərbaycanın olması onun qlobal sülh proseslərində mühüm aktora çevrildiyini göstərir.

Görüş Azərbaycanın çoxtərəfli diplomatiyasının uğurunun təcəssümüdür - həm Şərqlə, həm də Qərblə balanslaşdırılmış münasibətlər qurmaq bacarığı. Trampın Sülh Şurasının BMT-nin bəzi funksiyalarını əvəz edə biləcəyini bildirməsi kontekstində Azərbaycanın bu təşkilata daxil olması strateji əhəmiyyət kəsb edir. Regional sabitlik və iqtisadi inkişaf məsələlərində Azərbaycanın mövqeyinin güclənməsi gözlənilir.

Bu görüş eyni zamanda Azərbaycanın 2020-ci ildə əldə etdiği qələbədən sonra regional lider roluna çıxmasının beynəlxalq tanınması deməkdir. Ermənistanla sülh prosesində Azərbaycanın konstruktiv mövqeyi və konkret addımları ABŞ tərəfindən dəstəklənir və təşviq olunur".

Vüsalə İbrahimli

Telegramda izləyin