"O, ermənipərəst mövqedən çıxış edirdi" - Deputatdan AÇIQLAMA

Rüstəm Muradov xidməti vəzifəsini bitirdikdən sonra onun ardınca səslənən söz-söhbətlər bitib-tükənmək bilmir. İstər Azərbaycan tərəfi, istərsə də Qarabağda yaşayan erməni əsilli vətəndaşlarımız, Muradovun komandanlıq etdiyi sülhməramlı qüvvələrin fəaliyyətindən narazılıq göstəriblər.

Mövzu ilə bağlı Sonxeber.az saytına açıqlama verən deputat Müşfiq Cəfərov qeyd edib ki, Rüstəm Muradov fəaliyyəti dövründə sülhməramlı missiyasını tam yerinə yetirə bilməyib:
"Rusiyanın Qarabağdakı sülhməramlı kontingentinin komandanı, general-leytenant Rüstəm Muradovun fəaliyyətə başlamasından 9 aydan artıq vaxt keçir. Düşünürəm ki, Rüstəm Muradov fəaliyyəti dövründə sülhməramlı missiyasını tam yerinə yetirə bilmədi. Dəfələrlə atəşkəs pozuldu. Hətta hərbçilərimiz yaralandı. Ümumiyyətlə isə, onun fəaliyyətinin ilk günləri əsirlərin dəyişdirilməsi prosesində iştirakını təqdirəlayiq hal hesab etmək olar. Lakin müharibə bitdikdən sonra sülhü mühafizə etmək sülhməramlıların işi idi. Onun sülhməramlı kimi fəaliyyəti kifayət qədər təzadlı oldu. İlk günlərdən gördük ki, Rüstəm Muradov sülhməramlı missiyanın xarakteri, əhəmiyyəti, rolu kimi məsələlərdə kifayət qədər təcrübəsizdir. O, daha çox ermənipərəst mövqedən çıxış edib. Azərbaycan Ermənistanın təcavüzünə məruz qalaraq, zərər çəkmiş tərəf oldu".

Sonda deputat qeyd edib ki, sülməramlıların mövcudluğunun əsas məqsədi regionda sülhün bərqərar olmasına töhfə verməkdir və bu nöqteyi-nəzərdən sülhməramlıların rəhbəri general Muradovun üzərinə böyük məsuliyyət düşürdü.

Rafi Müslümov

Telegramda izləyin