YPG-yə etiraz məqsədilə başladılan "saç hörmə" aksiyasına qoşulan tibb bacısı saxlanılıb - VİDEO

Suriyada terror təşkilatı YPG üzvü olan bir qadının saçının kəsilməsinə etiraz olaraq DEM Partiya üzvlərinin başlatdığı "saç hörmə" aksiyasına dəstək verən tibb bacısı saxlanılıb.

Sonxeber.az xarici mediaya istinadən xəbər verir ki, Kocaelidə çalışan tibb bacısı xəstəxanada saçını hörərək çəkdiyi videonu sosial şəbəkədə paylaşmışdı. Hadisədən sonra barəsində araşdırma başlanan tibb bacısı dünən gecə saatlarında polis tərəfindən saxlanılıb.

DEM Partiya millət vəkilləri, Suriyada YPG üzvü bir qadının saçının kəsilməsinə etiraz etmək məqsədilə "saç hörmə" aksiyasına start verib. Aksiyaya DEM Partiya millət vəkili və TBMM sədr müavini Pervin Buldan da qoşularaq saçlarını hördüyü videonu paylaşıb.

Sosial mediada geniş müzakirələrə səbəb olan aksiyaya tanınmış simalar da dəstək verib. Kanal D-də yayımlanan və yüksək reytinq qazanan "Uzak Şehir" serialında "Nadim Baybars" obrazını canlandıran aktyor Nazmi Kırık paylaşdığı vizualla aksiyaya qoşulduğunu bildirib. Aktrisa Belçim Bilgin də saçlarını hörərək paylaşım edənlər arasında yer alıb.

Aksiyaya dəstək verənlərdən biri də Kocaelidə vəzifə yerinə yetirən tibb bacısı olub. Kocaeli İl Sağlamlıq Müdirliyi məsələ ilə bağlı yaydığı açıqlamada, tibb bacısının "Dövlət Qulluqçuları Qanunu" və "Dövlət Qulluqçularının Etik Davranış Prinsipləri"ni pozduğunu bildirərək, onun barəsində adli və inzibati araşdırmanın başladıldığını açıqlayıb.

Məlumata görə, tibb bacısı İ.A. İstanbulda bacısının evində saxlanılıb və prosedurlar üçün Kocaeli Polis İdarəsinə aparılıb.

Telegramda izləyin