Pezeşkianın oğlundan bu qadağaya - Sərt reaksiya

İran Prezidenti Məsud Pezeşkianın oğlu Yusif Pezeşkian ölkədə davam edən etirazlar fonunda tətbiq olunan internet məhdudiyyətlərinə sərt reaksiya verib.

"Qafqazinfo"nun məlumatına görə, Yusif Pezeşkian teleqram hesabında paylaşdığı açıqlamada bildirib ki, internetin bağlanması mövcud problemləri həll etmir, əksinə cəmiyyətdə narazılığı daha da dərinləşdirir.

Onun sözlərinə görə, rəqəmsal qadağalar ictimai gərginliyi azaltmaq əvəzinə, narazılığın artmasına səbəb olur.

Yusif Pezeşkian qeyd edib ki, internet qadağası zorakılıq görüntülərinin yayılmasının qarşısını almaq məqsədi daşısa da, bu yanaşma çıxış yolu deyil: "İnternetin bağlanması heç nəyi həll etməyəcək, sadəcə problemi təxirə salacaq".

Prezidentin oğlu hesab edir ki, rəqəmsal əlaqənin kəsilməsi hökumətlə cəmiyyət arasındakı etimadsızlığı daha da artırır və məhdudiyyətlərin davamı hətta əvvəllər razı olan vətəndaşları da narazılar sırasına qoşacaq.

O, etirazlar zamanı çəkilən görüntülərin gec-tez yayımlanacağını qeyd edərək, bu materiallarla üzləşməyin problemlərin həlli baxımından daha effektiv olacağını bildirib.

Qeyd edək ki, İranda 8 yanvardan etibarən tətbiq olunan internet məhdudiyyətləri sosial media və informasiya axınına ciddi maneələr yaradaraq, gündəlik həyat və iqtisadi fəaliyyətə mənfi təsir göstərib. Ölkə üzrə davam edən etirazlar fonunda tətbiq edilən bu məhdudiyyətlər həm daxildə, həm də beynəlxalq insan haqları təşkilatları tərəfindən tənqid olunub.

Telegramda izləyin