"Azərbaycan normallaşma prosesini siyasi bəyanatlar müstəvisindən çıxararaq praktik mərhələyə keçirir" - AÇIQLAMA

Azərbaycan Prezidenti İlham Əliyev Ermənistanın Baş naziri Nikol Paşinyanla iki ölkənin vətəndaş cəmiyyəti nümayəndələrinin qarşılıqlı səfərlərini alqışlayıb və etimad quruculuğu tədbirlərinin genişləndirilməsinin zəruriliyi barədə razılığa gəliblər.

Sonxeber.az xəbər verir ki, liderlər TRIPP və digər bağlantı layihələrinin həyata keçirilməsini müzakirə ediblər.

Azərbaycan Prezidenti və Ermənistanın Baş naziri iki ölkə arasında sülhün və sabitliyin daha da möhkəmləndirilməsi istiqamətində səyləri davam etdirməyə hazır olduqlarını bir daha təsdiqləyib, ikitərəfli normallaşma prosesinə dəstək məqsədilə təmasları davam etdirmək barədə razılığa gəliblər.

"Prezident İlham Əliyev ilə Ermənistanın Baş naziri Nikol Paşinyan arasında keçirilən son təmaslar göstərir ki, Azərbaycan normallaşma prosesini artıq siyasi bəyanatlar müstəvisindən çıxararaq institusional və praktik mərhələyə keçirir", - bunu Sonxeber.az -a açıqlama verən politoloq Tural İsmayılov deyib:

"Vətəndaş cəmiyyəti nümayəndələrinin qarşılıqlı səfərlərinin təşviqi və etimad quruculuğu tədbirlərinin genişləndirilməsi Bakının sülh gündəmini yalnız dövlətlərarası deyil, cəmiyyətlərarası müstəviyə də daşımaq niyyətinin göstəricisidir. Bu, post-münaqişə dövründə uzunmüddətli sabitliyin əsas şərtlərindən biridir.

TRIPP və digər bağlantı layihələrinin müzakirəsi isə Azərbaycanın regionda iqtisadi inteqrasiyanın əsas lokomotivi rolunu daha da möhkəmləndirdiyini göstərir. Bakı açıq şəkildə mesaj verir: sülh təkcə siyasi sənəd deyil, real iqtisadi dividentlər yaradan regional əməkdaşlıq modelidir. Ermənistan üçün bu layihələrə qoşulmaq artıq seçim yox, zərurətə çevrilir - əks halda ölkə regional proseslərdən kənarda qalmaq riskini artırır.

Ən önəmlisi, Prezident İlham Əliyevin ardıcıl və prinsipial siyasəti nəticəsində normallaşma prosesi Azərbaycanın müəyyən etdiyi çərçivə daxilində irəliləyir: qarşılıqlı suverenliyin tanınması, sərhədlərin delimitasiyası, kommunikasiya xətlərinin açılması və revanşist yanaşmalardan imtina. Ermənistan tərəfi isə getdikcə daha aydın şəkildə anlayır ki, alternativ ssenari yoxdur.

Bu kontekstdə liderlərin təmasları davam etdirmək barədə razılaşması Cənubi Qafqazda yeni təhlükəsizlik arxitekturasının məhz Bakının strateji baxışı əsasında formalaşdığını təsdiqləyir. Azərbaycan bu prosesdə passiv tərəf deyil - regionun gələcəyini dizayn edən əsas siyasi aktordur. Ermənistan isə bu reallığa uyğunlaşmaq məcburiyyətindədir".

Telegramda izləyin