"Azərbaycan üçün dünyanın ən qüdrətli dövləti olan ABŞ ilə strateji tərəfdaş olmaq böyük siyasi və beynəlxalq əhəmiyyət daşıyır" - DEPUTAT

"Azərbaycan Respublikasının Prezidenti İlham Əliyevin ABŞ-ın vitse-prezidenti Cey Di Vensin ölkəmizə rəsmi səfəri zamanı mətbuata verdiyi bəyanat Azərbaycan-ABŞ münasibətlərində tamamilə yeni, strateji və tarixi mərhələnin başlandığını nümayiş etdirdi. Bu səfər təkcə diplomatik hadisə deyil, həm də qlobal geosiyasi reallıqlar fonunda regionun gələcəyini müəyyənləşdirən mühüm siyasi dönüş nöqtəsidir".

Bu sözləri Sonxeber.az Milli Məclisin deputatı Şahin Seyidzadə danışıb.

O açıqlamasında qeyd edib ki, Prezident İlham Əliyevin çıxışında xüsusi vurğulanan məqam Tramp-Vens administrasiyasının Azərbaycana göstərdiyi müsbət münasibətə görə minnətdarlıq ifadəsi idi:

"Bu diplomatik jest sadəcə nəzakət çərçivəsində deyil, konkret siyasi nəticələrə əsaslanan təşəkkür idi. Altı ay əvvəl Vaşinqtonda Prezident Donald Trampla keçirilmiş tarixi görüş və Strateji Tərəfdaşlıq haqqında Xartiyanın hazırlanması məqsədilə İşçi Qrupunun yaradılması barədə sənədin imzalanması bugünkü nailiyyətlərin başlanğıc nöqtəsi olmuşdur.

Strateji Tərəfdaşlıq haqqında Xartiyanın imzalanması iki ölkə arasında münasibətlərin keyfiyyətcə yeni mərhələyə keçdiyini təsdiqləyir. Bu sənəd diplomatik münasibətlərin genişlənməsi deyil, siyasi, iqtisadi, enerji, texnoloji və təhlükəsizlik sahələrində sistemli və uzunmüddətli əməkdaşlığın institusional əsasının yaradılmasıdır.

Azərbaycan üçün dünyanın ən qüdrətli dövləti olan Amerika Birləşmiş Ştatları ilə strateji tərəfdaş olmaq böyük siyasi və beynəlxalq əhəmiyyət daşıyır. Bu fakt Azərbaycanın artan beynəlxalq nüfuzunun, müstəqil xarici siyasət kursunun və regional lider statusunun təsdiqidir.

Xüsusilə diqqət çəkən məqam Ağ Evdə Prezident Trampın iştirakı ilə Azərbaycan və Ermənistan arasında sülh sazişinin paraflanmasıdır. Altı ay ərzində regionda sabitliyin qorunması göstərir ki, bu proses real siyasi iradəyə əsaslanır. Azərbaycan artıq sülh şəraitində yaşamağın yeni mərhələsinə qədəm qoymuşdur".

Deputat onu da vurğuladı ki, Tramp-Vens administrasiyasının regiona ən mühüm töhfələrindən biri TRIPP - Beynəlxalq Sülh və Rifah naminə Tramp Marşrutu layihəsidir:

"Bu layihə yalnız Azərbaycanla Naxçıvan arasında maneəsiz bağlantını təmin etməyəcək, həm də Asiya ilə Avropanı birləşdirən qlobal nəqliyyat arteriyasına çevriləcəkdir. Bu, Orta Dəhlizin funksional genişlənməsi və regionun geoiqtisadi xəritəsinin yenidən formalaşması deməkdir.

Enerji təhlükəsizliyi məsələsində Azərbaycan artıq 16 ölkəyə, o cümlədən 11 NATO üzvünə təbii qaz ixrac edir. ABŞ ilə enerji əməkdaşlığının genişləndirilməsi, interkonnektor layihələrinin təşviqi və mülki nüvə əməkdaşlığı perspektivləri strateji tərəfdaşlığın mühüm istiqamətləridir.

Süni intellekt və rəqəmsal infrastruktur sahəsində əməkdaşlıq isə münasibətlərin gələcəyə hesablanmış komponentidir. ABŞ-ın aparıcı şirkətləri ilə əməkdaşlıq nəticəsində Azərbaycanda AI data mərkəzlərinin yaradılması, kibertəhlükəsizlik sahəsində bacarıqların artırılması və innovasiya körpülərinin formalaşdırılması planlaşdırılır.

Təhlükəsizlik sahəsində əməkdaşlıq da xüsusi əhəmiyyət daşıyır. Müdafiə sənayesi məhsullarının satışı, antiterror əməliyyatları, kibertəhlükəsizlik və humanitar minatəmizləmə sahəsində birgə fəaliyyət regionun sabitliyini möhkəmləndirəcəkdir.

Beləliklə, vitse-prezident Cey Di Vensin Azərbaycana səfəri təkcə diplomatik hadisə deyil, strateji transformasiyanın başlanğıcıdır. Azərbaycan-ABŞ münasibətləri artıq regional deyil, qlobal əhəmiyyət kəsb edən əməkdaşlıq modelinə çevrilir".

Vüsalə İbrahimli

Telegramda izləyin