Vaşinqtondakı təxribat ölkəmizə qarşı növbəti qarayaxma kampaniyasıdır: Dövlət Mühafizə Xidməti öz işini icra edib - VİDEO

Xəbər verdiyimiz kimi 19 fevral 2026-cı il tarixində Azərbaycan Respublikasının Prezidenti İlham Əliyevin Sülh Şurasının ilk iclasında iştirak məqsədilə Amerika Birləşmiş Ştatlarına səfəri zamanı bir qrup etirazçı Vaşinqton şəhərində yerləşən "Waldorf Astoria" mehmanxanasının qarşısında təxribatçı hərəkətlər törədib. Belə ki,

Prezident korteji mehmanxana ərazisinə yaxınlaşarkən etirazçılar mühafizə olunan əraziyə zorla daxil olmağa cəhd edərək Prezidentin avtomobilinə yönəlik hücum aktları həyata keçiriblər. Bu qrup, həmçinin Azərbaycan rəhbərliyinə qarşı nalayiq ifadələr işlədib.

Dövlət başçısının mühafizə olunan nəqliyyat vasitəsinin hərəkətinə maneçilik törədilməsinin və ya fiziki müdaxilə olunmasının ciddi təhlükəsizlik təhdidi yaratdığı nəzərə alınaraq, Prezidentin Təhlükəsizlik Xidmətinin dərhal müdaxilə etməkdən başqa seçimi qalmayıb. Təhlükəsizlik tədbirləri, standart əməliyyat prosedurlarına uyğun olaraq, yalnız təhlükəsizlik və mühafizənin təmin olunmasına yönəlib.

Bundan əlavə, ABŞ-nin Gizli Xidməti tərəfindən bəyan olunduğu kimi, mehmanxana ərazisi rəsmi təhlükəsizlik perimetrinə aid olub.

Hazırda bəzi həm Qərb, həm də müxtəlif rusdilli media qurumları tərəfindən Azərbaycan Prezidentinin mühafizə əməkdaşları ilə təxribatçı əhvali-ruhiyyəli bir qrup şəxs arasında baş vermiş insidentin əks olunduğu video təhrif olunmuş formada geniş şəkildə tirajlanır.

Hadisə ilə bağlı yayılan videoda açıq-aşkar görünür ki,özlərini "etirazçı" adlandıran şəxslər polis tərəfindən ərazini tərk etmələri tələb olunduğu halda, qəsdən təxribata əl atırlar.Ən önəmlisi isə etirazçılardan biri qəfil hərəkətlə mühafizəçilərin üzərinə doğru atılaraq sanki onları yarmağa cəhd edir. Əlbəttə bu da dövlət başçısının avtomobilinə real təhlükə riskinin yaranması demək idi.

Dövlət Mühafizə Xidmətinin əməkdaşları operativ və peşəkarcasına səlahiyyətləri çərçivəsində hərəkət edərək birbaşa vəzifə borclarını yerinə yetirərək Azərbaycan Respublikasının Prezidentin təhlükəsizliyini təmin ediblər.

Yayılan videoda açıq şəkildə göstərir ki, hadisələrin inkişafı dərhal reaksiya tələb edirdi. Təxribatçıların davranışları ABŞ hüquq-mühafizə orqanları tərəfindən də reaksiya ilə qarşılanıb. Lakin adi polis əməkdaşı ilə xüsusi təlim keçmiş peşəkar mühafizəçilərin reaksiya sürəti fərqlidir. Əgər etirazçılar polisin ictimai qaydanı pozmamaq və aksiyanı dayandırmaq çağırışına adekvat cavab versəydilər, mühafizəçilər mövqelərində qalardılar. Lakin müqavimət göstərildi.

Videoda görüldüyü kimi baş verənlər əvvəlcədən planlaşdırılıb. Baş verənlərin sonradan təhrif olunmuş formada mediada yayılması ölkəmizə qarşı növbəti təxribatın olduğunu sübut edir. Yaxından təhlil etdikdə isə, məsələn, BBC tərəfindən Azərbaycan Prezidentinin dövlət mühafizəsinə qarşı irəli sürülən ittihamların sübut bazasının olmadığı üzə çıxır. Çünki dövlət başçısının mühafizəçiləri belə hallarda nəzərdə tutulan hüquqi və peşəkar fəaliyyət alqoritminə uyğun şəkildə hərəkət ediblər.

Telegramda izləyin