"Kimsə reytinq qazanıb, yüksək məbləğdə pul qazanacaqsa, buna xalq nə etməlidir?" - AÇIQLAMA

Son illər televiziya və onlayn platformalarda yayımlanan bəzi proqramlar cəmiyyətdə ciddi narazılıq doğurur. Tamaşaçıların bir qismi efirə çıxan aparıcıların peşəkar hazırlıq səviyyəsini, dil və üslub problemlərini, eləcə də etik çərçivələrin pozulmasını tənqid edir.

Xüsusilə reytinq naminə qalmaqallı mövzuların qabardılması, şəxsi həyatın ifşası və bayağı ifadələrin normallaşdırılması ictimai müzakirələrin əsas mövzularından birinə çevrilib.

Media məkanında müşahidə olunan bu tendensiyaların sosial kökləri və mümkün nəticələri ilə bağlı suallar isə açıq qalır: Bu, təkcə fərdi məsuliyyətsizlikdirmi, yoxsa daha geniş struktur problemlərin göstəricisidir?

Mövzu ilə bağlı sosioloq Mətanət Məmədova Sonxeber.az -a açıqlama verib:

"Çox təəssüf ki, müasir dövrümüzdə bəzi efirlər yalnız aparıcıların əlindədir. Sanki həmin tv-lərin rəhbəri, verilişlərin rejissoru yoxdur, yalnız aparıcılar var və onlar nə istəyir, edir, nə istəyir, danışır, kimi istəyir, efirə çağırır, onunla necə istəyir, elə də rəftar edirlər.
Sanki bunlara tək bir tapşırıq verilib ki, nə edirsiniz, edin, verilişinizin reytinqini qaldırın, baxış sayı yığın. Həmin aparıcılar da bu tapşırığı əldə rəhbər tutub televiziya kanallarında at oynatmağa başlayıblar. Kimi çağırılan qonağı təhqir edir, kimi qonağın şəxsi həyatını müzakirə mövzusuna çevirir, kimi, öz səviyyəsinə uyğun suallar yağdırır.
Tv-lərə çağırılan qonaqlar da aparıcıların səlahiyyət daxilinə verilib və ya bu işi həyata keçirənlər elə aparıcılar ağıldadırlar. İctimaiyyət qarşısına çılpaq bədənlə çıxanları, bircə dəfə canlı oxuya bilmədiyini milyonlarla tamaşaçı qarşısında etiraf edib fonoqramma ilə insanları təhqir edənləri, studiyada sadəcə əyləşmək mədəniyyətinə məxsus olmayanları, televiziya kanallarında öz ailə məsələlərindən danışanları, dalaşa çıxıb bir-birini təhqir edən, söyüşən qadın və kişiləri haradan tapıb televiziyalara gətirirlər, anlamaq çətindir. Efirdə bütün bunların nümayişi reytinqdirsə, Allah kəssin bu verilişləri də, bunların qazandığı reytinqi də. Kimsə reytinq qazanıb, yüksək məbləğdə pul qazanacaqsa, buna xalq nə etməlidir? Bu verilişlərə baxmalıdırmı, yarıçılpaq qadınların, hər tərəfi estetik olan bəzi müğənnilərin biədəb hərəkətlərinə ailəsi, azyaşlı övladları ilə birlikdə tamaşa etməlidirmi?..
Elə bu səbəbdəndir ki, minlərlə insan evində Azərbaycan televiziya kanallarının 2-3-dən başqa heç birinə baxmır. Bunu bilirmi həmin tv rəhbərləri və aparıcıları? Onlara baxmağı özlərinə layiq görmürlər. Bu, bilirsiniz nə deməkdir? O deməkdir ki, siz bizim evimizə daxil olmağa layiq deyilsiniz.
Kim bu aparıcılara haqq verir ki, istədiklərini geyinir, danışır, insanlara yuxarıdan aşağı baxır, onların şəxsi həyatına müdaxilə edir, efirdə qalmaqal yaradır, küçə söhbətlərini orayadək gətirməyi bacarır?
Bu televiziyalara dəfələrlə xəbərdarlıq edilib. Düşünürəm ki, cəza tədbirləri tətbiq olunmalı, bir neçəsinin fəaliyyəti bir neçə saatlıq deyil, birdəfəlik dayandırılmalıdır ki, o birilərə də dərs olsun. Yoxsa mənəviyyatsızlıq yarışına girən bu tv kanalları getdikcə daha da özlərindən çıxacaq.
Tv-lərə nəzarət gücləndirilməlidir. Audiovizual Şura onlar haqqında yeni cəza qaydaları tətbiq etməlidir. Çünki tv-lər artıq köhnə qaydalarla işləmir. Dəyişənlər o qədərdir ki, buna qarşılıq olaraq qaydalar da dəyişməli, yenilənməli, sərtləşdirilməlidir. Əks təqdirdə bundan da dəhşətli halların şahidi olacağıq"

Telegramda izləyin