Sumqayıtda balaca idmançıların böyük mübarizəsi - Aquatlon üzrə açıq çempionat keçirildi

1 mart 2026-cı il tarixində Sumqayıt Olimpiya İdman Kompleksində Azərbaycan Triatlon Federasiyasının təşkilatçılığı ilə Aquatlon idman növü üzrə Sumqayıt şəhər açıq çempionatı keçirildi. Yarışda Elit yaş kateqoriyası ilə bərabər 7 yaş kateqoriyasında idmançılarıda iştirak etdilər.
Suyun içindən qaçış zolağına uzanan bu maraqlı yarışda iştirakçılar Aquatlonun iki əsas mərhələsi - üzgüçülük və qaçış üzrə bacarıqlarını nümayiş etdirdilər. Yarış boyu tribunalarda valideynlərin alqışları, meydanda isə idmançıların qələbə əzmi hiss olunurdu.
Çempionatın əsas məqsədi uşaqlar və gənclər arasında sağlam həyat tərzinin təbliği, idmana marağın artırılması və gələcəyin triatlon idmançılarının yetişdirilməsinə töhfə vermək idi. Balaca iştirakçılar isə göstərdilər ki, böyük qələbələrin yolu məhz belə kiçik, amma cəsarətli addımlardan başlayır.
Yarışın sonunda fərqlənən idmançılar diplom və medallarla təltif olundular. Həmin gün meydanda yalnız qaliblər deyil, bütün iştirakçılar qazandı - çünki onlar idman, iradə və özünəinamın vacib dərsini yaşadılar.
Azərbaycan Triatlon Federasiyası bu kimi yarışlarla ölkəmizdə triatlon və aquatlon idman növlərinin inkişafına dəstək verməyi və yeni nəsil idmançıların yetişməsinə şərait yaratmağı davam etdirir.

Telegramda izləyin