"Dənizdə bir su damlasıyam"

Türkiyənin tanınmış müğənnisi Çelik Ramazan ayında etdiyi xeyriyyə aksiyası ilə diqqət çəkib. Sənətçi Hatayda zəlzələdən zərər çəkmiş insanların bakkal və marketlərdə yaranmış borclarını ödəyib.

Sonxeber.az türk mediasına istinadən xəbər verir ki, məlumata görə, Çelik bölgədəki bir sıra kiçik mağazalara gedərək zəlzələdən zərər görmüş ailələrin yığılıb qalan borclarını bağlayıb. Onun bu addımı Ramazan ayında ehtiyacı olan insanlara dəstək olmaq məqsədi daşıyıb.

Müğənni etdiyi yardımı sosial media hesabında da paylaşaraq bu sözləri qeyd edib: "Dənizdə bir su damlasıyam". Çelik bildirib ki, bu yardım böyük bir şey olmasa da, insanların yükünü bir qədər yüngülləşdirmək istəyib.

Sənətçinin bu davranışı sosial şəbəkələrdə böyük rəğbətlə qarşılanıb. Bir çox istifadəçi Ramazan ayında edilən bu xeyirxah addımı təqdir edib.

Xatırladaq ki, Çelik uzun illərdir Türkiyə musiqi səhnəsində fəaliyyət göstərən tanınmış ifaçılardan biridir və zaman-zaman sosial layihələrdə də iştirak edir.

Telegramda izləyin