Trampı əsəbləşdirən müharibə sualı! - VİDEO

ABŞ Prezidenti Donald Trump İranla davam edən müharibə fonunda Yaxın Şərqə göndərilən 5 min hərbçi ilə bağlı suala sərt reaksiya verərək jurnalisti "çox əsəbiləşdirici insan" adlandırıb.

Sonxeber.az xarici mediaya istinadən xəbər verir ki, ABŞ prezidenti İranla davam edən qarşıdurma zamanı hərbi qüvvələrin bölgəyə göndərilməsi barədə verilən suala verdiyi cavabla gündəmə gəlib. Mətbuat konfransı zamanı jurnalist Trampa Yaxın Şərqə 5 min dəniz piyadası və hərbi dənizçi göndərilməsinin səbəbini soruşub.

Prezident isə suala birbaşa cavab vermək əvəzinə jurnalistə sərt reaksiya göstərərək "Sən çox əsəbiləşdirici bir insansan" ifadəsini işlədib. Dialoq qısa müddətdə sosial mediada yayılaraq Vaşinqtonda müzakirələrə səbəb olub.

ABŞ administrasiyası İranla davam edən müharibə səbəbindən bölgəyə əlavə hərbi qüvvələr göndərir. Tramp administrasiyasının qərarı ilə təxminən 5 min dəniz piyadası və dənizçinin Hörmüz boğazı ətrafına yerləşdirildiyi bildirilir.

Qeyd olunur ki, bu hərbi əməliyyat ABŞ və İsrail qüvvələrinin İran ərazisində intensiv hava hücumları həyata keçirdiyi və bölgədə gərginliyin sürətlə artdığı bir dövrdə baş verib.

Məlumata görə, ABŞ və İsrailin fevralın 28-də İran ərazisindəki hədəflərə qarşı başladığı genişmiqyaslı hücumlardan sonra müharibə artıq üçüncü həftəsinə daxil olub. Qarşıdurma zamanı İranın mühüm hərbi obyektləri hədəfə alınarkən, Tehran da bölgədəki ABŞ bazalarına və müttəfiq ölkələrə raket və pilotsuz uçuş aparatları ilə zərbələr endirir.

Ekspertlər hesab edir ki, ABŞ-ın bölgəyə əlavə hərbçi və döyüş gəmiləri göndərməsi münaqişənin daha geniş miqyaslı mərhələyə keçə biləcəyi ilə bağlı narahatlıqları artırır.

Telegramda izləyin